U-ISAYA 30 - IsiNdebele 2012 Translation

IGibhide ayinabubhadekelo

1USomnini wathi:

“Bazazizwa abantwana abanekani,

abenza amano kodwana kungasiwo wami,

benze isivumelwano ngaphandle kwentandwami,

bangezelele isono phezu kwesono.

2Ngaphandle kokukhombela indlela kimi

bayaphuma, behlele eGibhide,

kobana bayokukhosela ebuphephelweni bakaFaro,

baphephele emthunzini weGibhide.

3Ngalokho ukukhosela ebuphephelweni bakaFaro

kuzakuba lihlazo kini

nokuphephela emthunzini weGibhide

kube kurhubutjhwa kwenu.

4“Lokha iinkhulu zabo naziseTsowani

nabazenda babo sele bafike eRhanesi,

5omunye nomunye wabo uzakuba sehlazweni,

ngebanga lesizwe esingeze sababhadekela,

iye, isizwe esinganasizo nanzuzo,

kwaphela ihlazo nokurhubutjhwa.

6Umthwalo obotjhelwe eenlwaneni sewungesewula,

iye, enarheni yamahlungu nesizi,

lapha kunamabhubezi asikazi

naduna abhodlako,

iye, inarha yeenqandani

neenyoka ezimsinya inga ziyaphapha.

Bathwele umnothwabo emhlana wabodumbana

namagugwabo emalundeni wamakamela,

baya esizweni esinganabubhadekelo.

7Mbala, iGibhide imumoya kwaphela,

angeze yaba nobubhadekelo!

Ngalokho ngithi ngayo,

‘Ingunomrhaso ongasikinyekiko’.

8Khamba khona nje,

ufese ukutlole lokho phambi kwabo emqebethwini,

ukutlole ngokugobhodlha

ukuze kube ngokwesikhathi esizako,

iye, kube bufakazi banini nanini.”

Isizwe esihlubukako

9Ngambala lesi sisizwe esihlubukako!

Babantwana abakhohlisako,

abangalaleli iimfundiso zakaSomnini

10ngombana bathi kubaboni: “Ningaboni!”

Kubaphorofidi bathi: “Ningaphorofidi okuliqiniso kithi,

kodwana sitjelani okusikarako kwaphela.

Phorofidani isilahlekiso!

11Tjhiyani indlela yekadeni, nisuke kiyo;

nisisusele thina ngoCwengileko wakwa-Israyeli.”

12Ngalokho nakhu okwatjhiwo ngoCwengileko wakwa-Israyeli:

“Ngebanga lokobana nilahle ilizwi leli,

nabeka ithemba lenu ekugandeleleni nekohlakalweni,

nabambelela kikho,

13nje-ke, icala lelo kini lizakuba

njengelifa emthangaleni ophakamileko,

osele utjhigamele ukubhusuka phasi

nokuwa kwawo kwenzeka msinyana.”

14USomnini uzalisasambisa ngokungalitlhuweli.

Njengokwephuka kwembiza yombumbi lizakuphahlaka

kungabi neqetjhana hlangana neenquqwana

lokokha amalahle eziko

namkha lokukha amanzi esizibeni.

15Nakhu okwatjhiwo nguSomnini uSomandla

ongoCwengileko wakwa-Israyeli:

“Nanibuyela kimi nibekezele, nizakusinda,

amandlenu azakuba sekuzithobeni nethembeni.”

Kodwana nalile,

16nathi:

“Awa thina! Sizakubaleka ngeenjomani.”

Ngalokho-ke nizakubaleka kwamambala!

Godu nathi: “Sizakukhwela iinjomani ezinebelo khulu.”

Ngalokho-ke abanigijimisako bazakuba nebelo khulukhulu!

17Ikulungwana izakubaleka ngokwethuselwa ngoyedwa,

iye, nibaleke noke ngokwethuselwa ngabahlanu,

kufikela benisukelwe ninodwa tere

njengesika phezu kwesiqongolo sentaba,

iye, njengephawu phezu kombundu.

18Nokho uSomnini ulindele ukuba nomusa kini,

yeke, uzakuphakama ube nesisa kini,

ngombana uSomnini unguZimu wokulunga.

Babusisiwe boke abaqalelela kuye.

19Ngambala, nina bantu beZiyoni, bahlali beJerusalema, anisazukulila. USomnini uzakuba nomusa kini ekuzwakaleni kwesililo senu. Iye, nakasizwako uzasiphendula.

20Nanyana uSomandla aninikela isikwa sesizi namanzi wamatshwenyeko, yena ongumfundisenu angeze asazifihla godu namehlwenu azambona.

21Nanijikela ngesidleni namkha ngesinceleni, iindlebe zenu zizakuzwa ilizwi ngemva kwenu lisithi: “Nasi indlela: Khambani kiyo.”

22Yeke nizakusilaphaza abosingazimu ababazwe ngesiliva neenthombe zenu ezinamekwe ngegolide. Nizabalahla njengomtjhubelo. Nizakuthi kibosingazimabo: “Sukelani le!”

23UZimu uzakunisa izulu phezu kwembewu oyitjalileko esimini, akunikela ikoroyi okumkhiqizo wequlwani. Umkhiqizo lowo uzakuhloma bewunone. Mhlokho ifuywakho izakukarula emadlelweni abanzi;

24iinkomo nabodumbana abalima amasimu bazakudla ifuru ethanjisiweko eyaphuma nakweliwa ikoroyi ngetjhefula neforogo.

25Kenye nenye intaba ephakemeko nombundu omude kuzakuba nemilanjana egeleza amanzi ngelanga lokurhayilwa okukhulu lokha nakugirika imibhotjhongo.

26Ukukhanya kwenyezi kuzakufana nokwelanga. Ukukhanya kwelanga kubuyelelwe kalikhomba njengokukhanya kwamalanga alikhomba, mhlana uSomnini abopha amanceba wabantu bakhe, alaphe amaduma avezwe kubetha kwakhe.

I-Asiriya iyahlunguphazwa

27Qala, ibizo lakaSomnini livela kude,

ilaka lakhe liyavutha

lenza isimukuthu esimabhombo.

Iimbhena zakhe zizele itukuthelo,

nelimu lakhe lifana nomlilo oqothulako.

28Ukuphefumula kwakhe kufana nomlambo

ophuphuma ukufikelela entanyeni.

USomnini uyeza kobana ahlunge izizwe,

ngesihlungo sokurhayila;

iye, nokufaka emihlathini yabantu

amatomu abadurhisako.

29Nizakubhina iingoma

njengalokha nanizihlambulula

ebusuku ngaphambi komnyanya.

Kuzakuba nethabo ehliziyweni

njengalokha nakubethwa inghwani lekhambo

lokukhuphukela entabeni kaSomnini

olidwala laka-Israyeli.

30USomnini uzakuzwakalisa ilizwi lakhe elindondako;

etukuthelweni evuthako

uzakubonisa ukubetha kwengalwakhe

ngelangabi lomlilo oqothulako,

ngetjhada lezulu, ngesiwuruwuru nangesinanja.

31I-Asiriya izakubethwa ngevalo

lokha nayizwa ilizwi lakaSomnini

nalokha arhidla ngeswazi lakhe.

32Okhunye nokhunye ukurithwa ngeswazi lokuhlunguphaza

uSomnini azakulidosa phezu kwe-Asiriya,

kuzakuphekelelwa litjhada labosotjherere namaharibhana

negido lokuzahlukanisela.

Uzakulwa nama-Asiriya

33ngombana iziko lalungiselelwa kade;

iye, lahlelelwa ikosawo.

USomnini wenza umgodi weziko

watjhinga begodu waba banzi.

Kunamalahle avuthako neenkuni ezinengi,

nje-ke ukuphefumula kwakaSomnini

sele kuvuthela njengomlandelande wesibabuli.