UJOBHO 18 - IsiNdebele 2012 Translation

UBhilidadi ukhuluma ihlandla lesibili

1UBhilidadi umTjhurhi waphendula wathi:

2“Uzakuratharatha kuze kube nini?

Buyela emikhumbulwenakho!

Emva kwalokho singakhuluma.

3Kubayini usithathe njengeenkomo,

sibe bokeke emehlwenakho?

4Wena ozirathula ngetukuthelwakho.

Utjho bona inarha ingalahlwa ngebanga lakho,

namkha kususwe idwala linye endawenalo na?

5Ngambala umkhanyo weenkhohlakali uzakucinywa,

iye, amalahle womlilo wokhohlakeleko amthuthu.

6Umkhanyo ufiphele ngetendeni lakhe

nesibani sakhe lapho akhona siyacima.

7Ancitjhisiwe amabhadulwakhe anamandla,

amaqhingakhe ayamkhuba.

8Iinyawo zakhe zimrholela ngenedeni,

urhohlomela ngemgodini.

9Isithiyo simbamba ngesithende,

isifu siyamurhorheja.

10Ufihlelwe ikawule equlwanini,

iye, ubekelwe unoqhaka endleleni.

11Ivalo limethusa ngapha nangapha,

limhlala eenthendeni.

12Amandlakhe aqothulwa yindlala,

ihlekelele imlele nje, eqadi kwakhe;

13iqothula isikhumba sakhe

izibulo lokufa liqede amalungu womzimbakhe.

14Udzwetjulwa ebuphephelweni betende lakhe,

alethwe ekosini yevalo.

15Etendeni lakhe kunomlilo,

isibabuli sisabalele endawenakhe yokuhlala.

16Imirabhakhe ngaphasi iyomelela

neempande zakhe ngehla ziyabuna.

17Ukukhunjulwa kwakhe kuyaphela ephasini,

ibizo lakhe alisaphathwa enarheni.

18Ususwa ekukhanyeni, aphoselwe ebumnyameni,

aqotjhwe ephasini.

19Akanabantwana namkha isizukulwana ebantwini bakwabo,

sekutlhogeka ngitjho noseleko lapha gade ahlala khona.

20Bangetjingalanga bayakhena mhlana awako,

bepumalanga bangenwa kukwesaba,

21bathi, ‘Unje-ke umuzi womgulukudu!

Le, bekuyindawo yomuntu ongazi uZimu!’ ”