Lyfr y Psalmau 148 - Welsh Metrical Psalms by Morris Williams 1850

1-2Molwch yr Arglwydd Ion o’r nef,

Yn yr uchderau molwch Ef,

Holl luoedd ei angylion glân;

3Chwi gannaid haul a lloer uwch ben,

Pob seren sy ’n goleuo ’r nen,

Canmolwch Enw Duw ar gân.

4Molwch Ef, nef y nefoedd draw,

A chwithau ’r dyfroedd sydd uwch law;

5Canmolant fyth yr Arglwydd Rhi;

Pan archodd Ef, fe ’u crewyd oll,

6Drwy ’r oesoedd safant yn ddi‐goll;

Rhoes ddeddf, ac ni ’s troseddir hi.

7Molwch yr Ion o’r ddaear lawr,

Y dreigiau a’r dyfnderau mawr,

Eithafion a gwaelodion môr:

8Chwi dân a chenllysg, eira a tharth,

A gwỳnt ystormus o bob parth

Sy ’n chwythu wrth orchymyn Ior.

9Pob cribog fynydd, pob bryn glas,

Pob coedydd aeron per eu blas,

Y cedrwydd oll a’u gwyrddlas frig;

10Bwystfilod, anifeiliaid byd,

Chwithau ymlusgiaid oll ynghŷd,

Asgellog adar maes a gwig:

11Brenhinoedd oll, a’r bobl i gyd,

T’wysogion, a holl farnwŷr byd,

Pawb sy ’n preswylio daear gron;

12Chwychwi wŷr ieuangc oll yn llu,

Gwyryfon a llangcesau cu,

Henafgwŷr dwys, a llangciau llon:

13Canmolwch Arglwydd Ior y nef,

Canys ei unig Enw Ef

Sydd uchel ac anfeidrol fawr:

Mae ardderchowgrwydd ein Duw ni

Mewn urddas ac arswydol fri

Goruwch y nefoedd faith a’r llawr.

14A chorn ei bobl a gwyd Efe

Yn uchel iawn yn nheyrnas ne’,

Moliant ei brïod Saint ei Hun,

Israel ei blant a’u llwythau llawn,

Y rhai sydd atto ’n agos iawn:

Clodforwch Enw ’r Arglwydd Cun.