Lyfr y Psalmau 96 - Welsh Metrical Psalms by Morris Williams 1850

1I’r Arglwydd cenwch newydd gân,

I’r Arglwydd cenwch, fawr a mân,

Drwy holl gwmpasoedd daear lawr;

2Ar gân bendigwch Enw ’r Ion,

Boed beunydd yn eich genau son

Am waith ei iachawdwriaeth fawr.

3Datgenwch wrth y bobl i gyd,

Traethwch i holl genhedloedd byd

Ei wyrthiau a’i ogoniant Ef:

4Mawr a moliannus iawn yw Duw,

Arswydus uwch y duwiau yw,

Ar uchel orsedd nef y nef.

5Beth wrth yr Ion yw duwiau ’r byd?

Eilunod gweigion gwael i gyd:

Duw Ner a wnaeth y nefoedd fry.

6O’i flaen mae urddas hardd a grym,

Gogoniant a disgleirdeb llym

Sy fyth ynghafell lân ei Dŷ.

7Rhoddwch, dylwythau ’r byd, i Dduw,

Rhowch iddo nerth ac urddas gwiw,

8Rhowch iddo fawl ei Enw glân:

Dygwch offrymmau ger ei fron,

A deuwch i’w gynteddau ’n llon,

Ennyned iddo ’ch clod yn dân.

9Mewn ardderchowgrwydd purdeb gwiw

Yn sanctaidd oll addolwch Dduw;

Ofned o’i flaen y ddaear lawr:

10Dywedwch wrth y bobl i gyd

Mai Duw sy ’n llywodraethu ’r byd

Ar orsedd wen ei allu mawr.

Y ddaear a sicrhâes Efe

Yn gref ddïogel yn ei lle; —

Y byd yn iawn a farn yr Ior:

11Poed uchelderau ’r nef yn llon,

A gorfoledded daear gron,

Rhued cyflawnder eigon môr.

12-13Y maes a’i ffrwythau ’n llawen boed,

A chaned irlas breniau ’r coed

Eu cerdd yn llon o flaen ein Duw:

Fe ddaw, fe ddaw, i farnu ’r byd

A’i bobl yn gyfiawn oll i gyd;

Cywir ac uniawn Farnydd yw