Lyfr y Psalmau 139 - Welsh Metrical Psalms by Morris Williams 1850

1Duw, chwiliaist fi;

2adweini ’n llwyr

Fy nghodiad a’m heisteddiad oll;

Fy meddwl draw o bell, a’m bryd,

Tydi a’i gwyddost yn ddi‐goll.

3Amgylchi ’r llwybr a’r gwely mau,

Wyt hyspys yn fy ffyrdd o hyd;

4Ac ar fy nhafod nid oes air,

Ond Ti a’i gwyddost ef i gyd.

5Amgylchaist fi ymlaen ac ol,

Gosodaist arnaf, Ior, dy law;

6Rhy ryfedd im’ yw gwybod hyn,

Mae ’n uchel bell o’m golwg draw.

7Oddi wrth dy Yspryd i b’le ’r af

Yn nirgel fannau ’r ddaear gron?

O’th ŵydd i b’le y ffoaf fi,

Na byddi yno ger fy mron.

8Pe dringo wnawn i’r nefoedd fry,

Dy wyddfod yno, Ior, a gawn;

Pe gwnawn fy ngwely yn uffern ddofn,

Mae yno ’th bresennoldeb llawn.

9Pe cym’rwn adain bore wawr,

A thrigo yn eithafion môr;

10Yno ’m tywysit yn dy law,

Y’m daliai dy ddeheulaw, Ior.

11“Caddug tywyllwch dudew ’r nos,”

Meddwn, “o’th wŷdd a’m cuddiai ’n wir;”

Ond wele fagddu dunos ddofn

O’m hamgylch yn oleuni clir.

12Nid tywyll dunos rhagot Ti,

Caddug y fagddu ’n oleu fydd;

I Ti yr un yw tywyll nos

A llewyrch disglair hanner dydd.

YR AIL RAN

13F’ arennau ydynt eiddot, Ner,

Ynghrôth fy mam y’m toaist Ti:

14Ofnadwy, rhyfedd iawn y’m gwnaed,

Am hynny y’th glodforaf fi.

Mi wn mai rhyfedd yw dy waith;

15Ni ’m cuddiwyd rhagot yn y bru,

Yn ddirgel pan y’m gwnaeth dy law

Yn gywraint yn y ddaear ddu.

16Gwelaist f’ annelwig ddefnydd gynt

A’th lygad, cyn ffurfhâu fy llun;

’Sgrifenaist fy aelodau i lawr

O fewn dy lyfr, cyn gorphen un.

17Mor werthfawr yw ’th feddyliau im’!

Mor ddirfawr yw eu swm di‐ri’!

18Amlach eu rhif na ’r tywod man:

Pan ddeff’rwyf, wyf fyth gyd â Thi.

Y DRYDEDD RAN

19Duw, lleddi Di ’r annuwiol oll,

A gwnei hwynt oll yn anrhaith;

Am hynny, chwi wŷr gwaedlyd trwch,

Oddi wrthyf ciliwch ymaith.

20Ysgeler wŷr, â’u gwar yn syth,

Llefarant fyth i’th erbyn;

Ni chymmer neb mo ’th Enw, Ner,

Yn ofer, ond dy elyn.

21Cas gennyf dy gaseion Di,

Ynt ffiaidd i fy nghalon;

22Llawn yw fy nghas i’r giwed flin,

Maent oll i mi ’n elynion.

23Chwilia, O Dduw, a phrawf fi i gyd,

A gwybydd fryd fy nghalon;

24I’r ffordd drag’wyddol dwg fi ’n glau

O lwybrau ’r annuwiolion.