Lyfr y Psalmau 38 - Welsh Metrical Psalms by Morris Williams 1850

1O Arglwydd, na cherydda

Fi yn dy lid a’th wg,

Ac yn dy dost ddigllonedd

Na chospa ’m bai a’m drwg:

2Yn wastad glynu ynof

Y mae dy saethau Di,

A’th lidiog law geryddol

Sy ’n orthrwm arnaf fi.

3Fy nghnawd sy ’n llawn afiechyd

Gan faint dy lid yn awr;

I’m hesgyrn nid oes heddwch

Gan faich fy meiau mawr:

4A thros fy mhen aeth tonnau

Fy holl gamweddau dwys;

Baich ydynt yn fy llethu,

’Rwy ’n pallu dan eu pwys.

5Fy nghleisiau a bydrasant,

Llygrasant gan fy nrwg;

6Yn ddirfawr y’m gostyngwyd

Gan orthrwm bwys dy wg:

’Rwy ’n cerdded yn alarus

Trwy gydol maith y dydd;

7Fy lwynau ’n llawn ffieidd‐dra,

A’m cnawd yn afiach sydd.

8Anafus yw f’ archollion,

Fy nerth yn egwan sydd;

Gan ruad trwm f’ ochenaid

Mae ’nghalon wan yn brudd.

9O flaen dy wyneb, Arglwydd,

Mae ’m holl ddymuniad i,

Fy ngwaedd a’m dwys ochenaid

Ni chuddiwyd rhagot Ti.

10Fy nghalon wan sy ’n crynu,

Fy nerth a’m gad yn wyw;

Y llewyrch aeth o’m llygad,

A disglair mwy nid yw:

11Fy ngharwŷr dan ymgroesi

A safent oddi draw;

A safai ’m cyfneseifiaid

O hirbell ger eu llaw.

12Y rhai a geisient f’ einioes,

Gosodent fagl i’m traed;

A cheisient fy niweidio,

Gan gynllwyn am fy ngwaed;

A thraethent anwireddau,

Dych’mygent beunydd ddrwg;

13A mi ni chlywn, fel byddar,

Heb yngan gair mewn gwg.

14Oeddwn fel gwr ni chlywai

Eu geiriau coeg a’u gwaith,

Heb yngan gair i’w herbyn,

Na ’u hargyhoeddi chwaith:

15O herwydd im’ obeithio,

Ion tirion, ynot Ti,

Ti glywi ’m prudd ochenaid,

Gwrandewi lais fy nghri.

16Gweddïais rhag i’m herbyn

Eu llawenychu ’n fawr;

I’m herbyn ymfawrgent

Pan lithrai ’m troed i lawr:

17’Rwy ’n barod fyth i gloffi

Wrth rodio ’r ddaear hon,

A’m clwyfau blin dolurus

Sy ’n wastad ger fy mron.

18Cyffesaf wrth dy orsedd

Yr holl anwiredd mau;

O herwydd maint fy mhechod

Mae ’nghalon yn pruddhâu;

19Egnïol yw ’m gelynion,

A nerthol yw eu grym;

A beunydd heb un achos

Amlhâ ’ngelynion llym.

20Am dda, rhyw ddrwg a dalant,

Gan wrthwynebu ’th was;

Pan wnelwyf ddim daioni,

Rhônt am fy nghariad, gas. —

21Ym mhell na ddos oddi wrthyf,

O Dduw, na ad fi mwy;

22I’m cymmorth, Arglwydd, brysia,

Iachawdwr wyt i’m clwy’.