Lyfr y Psalmau 79 - Welsh Metrical Psalms by Morris Williams 1850

1Daeth y cenhedloedd, Arglwydd,

I’th etifeddiaeth Di;

Dy Deml a halogasant,

Dy Deml o sanctaidd fri:

Chwalasant Salem sanctaidd,

Carneddau ydyw ’n awr;

Ei theg uchelion furiau

Maluriwyd oll i lawr.

2I’r adar a’r gwylltfilod

Y rhoisant gnawd dy Saint,

3A’u gwaed fel dwfr yn rhedeg

Yn Salem fawr ei braint!

Ac nid oedd neb a’u claddai: —

4Fe ’n gwawdir o bob parth;

I bawb a’r sydd o’n hamgylch

Gwatwor‐gerdd ŷm a gwarth.

5A ddigi Di ’n dragywydd,

O Dduw? pa hyd? pa ham?

A lysg dy lym eiddigedd

Byth bythoedd fel y fflam?

6Na! tywallt ar y bobloedd

Dy lid, nid arnom ni,

Ac ar bob teyrnas euog

Na ’s parcho d’ Enw Di.

7Yn ddifrod gwnaethant Jacob,

Ai drigle ’n anial dir: —

8Ein beiau gynt i’th erbyn

Na chofia, Naf, yn hir:

O brysied, brysied attom

Dy dostur gariad Di;

Dy ras a’th fawr drugaredd

Iachao ’n llesgedd ni

9Duw ein hiechyd, rho dy gymmorth,

Gwared ein heneidiau ’n awr;

Bydd dosturiol wrth ein beiau,

Ion, er mwyn dy Enw mawr.

10Pa’m y dywed y cenhedloedd,

“Pa le ’n awr y mae eu Duw?”

O poed iddynt yn ein golwg

Addef mai yr Arglwydd yw!

Gwyped y cenhedloedd weithian

Mai Tydi sy ’n Arglwydd mwy,

Wrth it’ ddïal gwaed dy weision

A dywalltwyd ganddynt hwy: —

11Gwrando gwyn y carcharorion,

Derbyn eu huchenaid brudd;

Rhoed galluog fraich dy gryfder

Blant marwolaeth oll yn rhydd.

12Tâl i fynwes ein cym’dogion,

Tâl yn seithblyg am eu gwaith,

Gwawd eu geiriau cas i’th erbyn,

Dirmyg eu cableddus iaith.

13Molwn ninnau, praidd dy borfa,

Di, ein Harglwydd Dduw di‐lyth;

Canwn glod dy ras galluog

O oes i oes heb dewi byth.