Lyfr y Psalmau 72 - Welsh Metrical Psalms by Morris Williams 1850

1Duw, dod i’r Brenhin farnau ’th glod,

Dy wir i Fab y Brenhin dod;

2Fe farn Efe dy bobl yn iawn,

Dy druain mewn uniondeb llawn.

3Mynyddau hardd a bryniau ’r tir

Dygant i’r bobloedd heddwch gwir;

4Fe farna druain bobl y wlad,

I blant y tlodion mae yn Dad.

Gweryd y rheidus yn ei ras,

A dryllia ’r traws orthrymmydd cas:

5O oes i oes yr ofnant Ef

Tra paro haul a lloer y nef.

6Fel gwlith ar wlân y daw Efe

I lawr yn fendith hael o’r ne’;

Fel cawod o ireiddiol wlaw

Yn mwydo ’r ddaear grin, y daw.

7Blodeua ’r cyfiawn yn ei ddydd,

Amlder o hedd tra lloer a fydd:

8Rheola o fôr i fôr i gyd,

O’r afon hyd derfynau ’r byd.

YR AIL RAN

9Trigolion yr anialwch cras

Ymgrymmu wnant ger bron ei ras;

A gwelir ei gaseion trwch

Yn isel oll yn llyfu ’r llwch.

10Brenhinodd Tarsis rhônt o’u bodd,

A’r pell ynysoedd, iddo rodd;

Arabia boeth a Seba ’nghyd

Offrymmant eu trysorau drud.

11Daw holl frenhinoedd daear gron

I blygu ’n barchus ger ei fron;

Daw ’n ufudd i’w wasanaeth Ef

Bobloedd pob gwlad o dan y nef.

12-13Canys Efe a wrendy lais

Y tlawd — fe’i gweryd ef rhag trais;

Gweryd y rheidus gwael a gwan

A’r ni bo noddwr ar ei ran.

Ei ffafr a rydd i’r tlawd a’r gwael,

I’r truain rhanna ’i roddion hael;

Gwaedd yr anghenog rai a glyw,

Achubydd eu heneidiau yw.

14Achuba ’u henaid, ar eu cais,

Oddi wrth ormesol dwyll a thrais;

A gwerthfawr yn ei olwg mwy

A fydd eu gwaedd a’u heinioes hwy.

Y DRYDEDD RAN

15Byw fydd, a chaiff o Seba boeth

Offrymmau gwirfodd o aur coeth;

Ymbiliant drosto ar Dduw nef,

A beunydd y clodforir Ef.

16Bydd dyrnaid bach o ŷd yn awr

Yn ffrwytho ’m mhen mynyddoedd mawr;

Ysgydwa ’i gnwd yn donnau fyrdd

Fel pennau cedrwŷdd Liban wyrdd.

Blodeua ’r ddinas gan ei ras

Fel irdwf lysiau daear las;

17A phery ei Enw Ef a’i ddawn

Cyhyd a thrag’wyddoldeb llawn.

Fe saif ei Enw clodfawr Ef

Tra safo haul yn uchder nef;

Bendithir ynddo lwythau ’r byd,

A’i glod a seinia ’r bobl i gyd.

18Bendigaid fyddo ’r Arglwydd Dduw,

Duw Israel, Arglwydd Jacob yw;

Ei waith ei Hun a’i allu mawr

Yw rhyfeddodau nef a llawr.

19Gogoned Enw Duw di‐lyth

A fyddo ’n fendigedig byth;

Clod a gogoniant mawr ei ras

Fo ’n toi cwmpasoedd daear las.