Lyfr y Psalmau 77 - Welsh Metrical Psalms by Morris Williams 1850

1A’m llef ar Dduw y gwaeddais,

A thaer ar Dduw fu ’m llef;

2Yn nydd fy ing y ’i ceisiais,

A chlybu ’m llais o’r nef:

Lliw nos fy mriw a redodd,

Dïangodd melus hûn;

Ac ni ’s goddefai f’ enaid

Ddiddanwch neb rhyw ddyn.

3Er cofio ’m Harglwydd grasol,

Cawn drallod fyth yn rhan;

Mewn ing a therfysg yspryd

Fe gwynai f’ enaid gwan:

4’Rwyt Ti ’n fy nal yn neffro,

Gan syndod wyf yn fud:

5Ystyriais yr hen oesoedd,

Blynyddoedd bore ’r byd.

6Fy nghân y nos a gofiaf

Am dy drugaredd lwys;

Ymddiddan ’rwyf â’m calon,

A’m hyspryd chwilia ’n ddwys:

7A fwrw f’ Arglwydd grasol

Fy enaid heibio ’n hwy?

Ai ni bydd Duw mor dirion

A mi ’n gymmodlon mwy?

8A ddarfu ei drugaredd?

A balla ’i ras Ef byth?

Ai nid yw Gair addewid

Yr Ior yn Air di‐lyth?

9A all fy Nuw tosturiol

Anghofio trugarhâu?

A gauwyd gras y nefoedd

Mewn sorriant i barhâu?

YR AIL RAN

10Na! dywedais, “Dyma ’m gwendid,

Gwendid anghrediniaeth yw;” —

Cofiaf etto hen flynyddoedd

Dehau law ’r goruchaf Dduw:

11Cofiaf dy weithredoedd, Arglwydd,

D’ wyrthiau gynt a gofia ’th was;

12Ar dy waith y dwys fyfyriaf,

Soniaf byth am wyrthiau ’th ras.

13Duw! dy ffordd sydd yn y Cyssegr:

Pa dduw fel ein Harglwydd ni?

14Ti sy ’n gwneuthur rhyfeddodau;

Gŵyr y bobl dy nerthoedd Di:

15A llaw gadarn braich dy gryfder

Yr achubaist ar eu hynt

Feibion Jacob a’i fab Joseph,

Plant dy hen Israeliaid gynt.

Y DRYDEDD RAN

16Y dyfroedd a’th ganfuant, Ior,

Dwfn eigion môr a’th welodd;

Ofnasant rhag yr wyneb tau,

Dy ddychryn a’u cythryblodd.

17Syrthiai ’r cymmylau ’n ddwfr i lawr,

Ymdoddai ’r fawr ffurfafen;

Ehedai ’th gyflym saethau ’n glau,

Godyrddai caerau ’r wybren.

18Twrf taran aruthr groch dy lef

O gylch y nef a ruai;

Melltennai ’r tân drwy nef a llawr,

A’r ddaear fawr a grynai.

19Dy ffyrdd sydd yn yr eigion, Ior,

Yn nyfnder môr mae ’th lwybrau;

Ond er olrheinio ’th ffyrdd ar d’ ol,

Ni ’s gwelir ôl dy gamrau.

20Dy bobl arweiniaist gynt i’w gwlad,

Yn Fugail mad i’w porthi;

A Moses fwyn ac Aaron caid

Yn is‐fugeiliaid itti.