Lyfr y Psalmau 42 - Welsh Metrical Psalms by Morris Williams 1850

1Fel y brefa ’r hydd a’r carw

Am yr afon loyw las,

Felly f’ enaid innau, Arglwydd,

Sydd yn llefain am dy ras.

Mawr yw hiraeth

F’ yspryd am gymdeithas Duw.

2Syched blin sydd ar fy nghalon

Am gymdeithas y Duw byw;

O na chai ’m hiraethus enaid

Byth fod gyd â ’m Harglwydd Dduw!

O pa ddiwrnod

Caf ymddangos ger dy fron?

3Wylo ’r dagrau ydyw f’ ymborth,

Ar fy nagrau ’r wyf yn byw:

Hwythau ’n gofyn immi beunydd,

“Pa le weithian mae dy Dduw?”

Arglwydd tyred

I ddiddanu f’ enaid prudd.

4Wrth fyfyrio ’n ddwys ar hynny,

Toddai f’ enaid yn fy mron;

Canys byddwn gynt yn rhodio

Gyd â’r Saint i Dŷ Dduw ’n llon,

Mewn gorfoledd,

Megis tyrfa ’n cadw gwyl.

5F’ enaid ofnog, pa ’m y crymmi

Mor iselaidd, gwael a gwyw?

Paid â’th derfysg, paid â’th ochain,

Dyro d’ obaith ar dy Dduw:

Molaf etto

Iachawdwriaeth bur ei wedd.

6Er mor isel ydyw f’ enaid,

Cofiaf Di, fy Arglwydd mawr,

Yma ’n nhir yr hen Iorddonen,

Lle ’rwy ’n gorfod crwydro ’n awr;

O fryn Misar

Cofiaf Hermon, mynydd Duw.

7Geilw dyfnder dig ar ddyfnder;

Rhua ’u twrf o’m hamgylch i;

Gan ryferthwy dy lifeiriant,

Adlais dy bistylloedd Di:

Llif dy donnau

Oll a dorrodd dros fy mhen.

8Archa ’m Duw ei rad drugaredd

Immi ’n rhan yngoleu dydd;

A’i beroriaeth nefol hyfryd

Gyd â mi liw nos a fydd:

Gweddi f’ enaid

Sydd ar Dduw fy mywyd cu.

9Wrth fy Nuw a’m Craig dywedaf,

“Pa’m y llwyr anghofi ’th was?

Pa’m y rhodiaf mewn wylofain

Dan ormesol drais fy nghas?”

Arglwydd grasol,

Nac anghofia ’m henaid mwy.

10Gwawd a dirmyg fy ngelynion,

Cledd yn gwanu f’ esgyrn yw,

Tra dywedant wrthyf beunydd,

“Pa le weithian mae dy Dduw?”

Tyred, Arglwydd,

I ddiddanu ’m henaid prudd.

11F’ enaid ofnog, pa’m y crymmi

Mor iselaidd, gwael a gwyw?

Paid â’th derfysg, paid â’th ochain,

Dyro d’ obaith ar dy Dduw:

Molaf etto

Iachawdwriaeth bur ei wedd.