Lyfr y Psalmau 43 - Welsh Metrical Psalms by Morris Williams 1850

1Barn fy marn a dadleu ’m hachos,

Arglwydd, yn dy lys yn glau,

Rhag y genedl annhrugarog,

Rhag y dyn anghyfiawn gau;

Oh! f’ Eiriolwr,

Dadleu drosof yn dy ras.

2Ti yw Duw fy nerth a’m gallu;

Pa’m y bwriaist heibio ’th was?

Pa’m y rhodiaf yn alarus

Dan ormesol drais fy nghas?

Arglwydd grasol,

Paid â’m bwrw ymaith mwy.

3Anfon d’ oleu a’th wirionedd,

A thywysant hwy fyfi

Draw i fynydd dy sancteiddrwydd,

Draw i’th hawddgar bebyll Di:

Gad i’m gerdded

Dan d’ arweiniad, Arglwydd Ior.

4Yna ’r af at Allor Gwiwner,

Allor Aberth mawr y ne’;

Hwn yw Duw fy mhur orfoledd,

Duw f’ hyfrydwch yw Efe:

Ar y delyn

Fwyn y’th folaf Di, fy Nuw.

5F’ enaid ofnog, pa’m y crymmi

Mor iselaidd, gwael a gwyw?

Paid â’th derfysg, paid â’th ochain,

Dyro d’ obaith ar dy Dduw:

Molaf etto

Iachawdwriaeth bur ei wedd.