Lyfr y Psalmau 143 - Welsh Metrical Psalms by Morris Williams 1850

1Arglwydd, gwrando lef fy ngweddi,

Erglyw gri ’m deisyfiad gwael;

Clyw er mwyn d’ addewid rasol

A’th gyfiawnder nefol hael;

2Ac na ddwg dy was i gyfrif

Yn dy gyfiawn Lys mewn brawd;

Gwn na chyfiawnhêir, O Arglwydd,

Ger dy fron un dynol gnawd.

3F’ enaid gwan fy nghas erlidiodd,

F’ yspryd curodd hyd y llawr;

Mewn tywyllwch gwnaeth im’ drigo,

Fel mewn beddrod, heb un wawr:

4Pallu, megis ar ymadael,

Ynof mae fy yspryd tlawd;

Synnu mae fy nghalon druan

Gan fy nghystudd yn fy nghnawd.

5Yr hen ddyddiau gynt a gofiais,

Syn‐fyfyriais ar dy waith;

Dwys bryderai fy meddylfryd

Am dy holl weithredoedd maith:

6Lledais fry fy nwylaw attat

Yn f’ ymbiliau nos a dydd;

F’ enaid, megis maes sychedig,

Am dy ras mewn hiraeth sydd.

7Arglwydd, gwrando ’m llef hiraethlon,

Pallodd f’ yspryd am dy hedd;

Na chudd d’ wyneb siriol rhagof,

Rhag im’ syrthio i bwll y bedd:

8Moes im’ glywed llais dy gariad

I’m diddanu fore glas;

Ynot, Arglwydd, y gobeithiaf,

Pan ddeallwyf ffordd dy ras.

Yn dy ffordd, fy Nuw, y rhodiaf,

Dyrchaf f’ enaid attat Ti;

9Gwared fi rhag trais y gelyn,

Yn dy law ’r ymguddiais i:

10Dysg im’ wneuthur dy ewyllys,

Ti yw ’m Harglwydd Ior a’m Duw;

Dy Lân Yspryd fyddo ’n f’ arwain

Mewn unionder tra bwyf byw.

11Duw, bywhâ fi â’th drugaredd,

Mawl i’th Enw byth fydd hyn;

Ac er mwyn dy bur gyfiawnder

O gyfyngder f’ enaid tyn:

12O distrywia ’m holl erlidwŷr,

Poenwŷr f’ enaid, yn dy ras;

Gwared f’ enaid ofnus rhagddynt,

Canys ydwyf itti ’n was.