Lyfr y Psalmau 47 - Welsh Metrical Psalms by Morris Williams 1850

1Curwch ddwylaw, bobl y ddaear,

Llafar genwch i Dduw ’r nef:

2Duw Goruchaf yw ei Enw,

Brenhin daear gron yw Ef.

Bobloedd, ofnwch

Ac arswydwch ger ei fron.

3Dwg Efe ’r cenhedloedd danom,

Dan ein traed y bobloedd oll;

4Dethol in’ ein hetifeddiaeth,

Etifeddiaeth lawn ddi‐goll,

Harddwch Jacob,

Gwrthrych cu ei hoffder Ef.

5Pan aeth Duw i fro ’r uchelder,

Bloedd o groesaw roddai ’r nef;

Udgyrn arian Gwynfa lawen

Seinient pan ddyrchafodd Ef:

Haleluiah!

Seiniwn ninnau ’n unfryd oll.

6Cenwch fawl i’n Brenhin, cenwch,

Cenwch lafar glod i Dduw;

7Cenwch foliant yn ddeallgar,

Brenhin yr holl ddaear yw:

Haleluiah!

Duw sy Frenhin daear gron.

8Mae teyrnasoedd byd a’i bobloedd

Dan deyrn‐wialen ein Duw ni;

Ar ei orsedd wen mae ’n eistedd,

Gorsedd ei sancteiddiol fri:

Haleluiah!

Duw yw Llywydd nef a llawr.

9Wele ’n awr frenhinoedd daear

Yn ymgynnull dano ’nghyd,

Oll yn wir Israeliaid iddo: —

Eiddo Duw yw estylch byd:

Haleluiah!

Dirfawr y dyrchafwyd Ef.