Lyfr y Psalmau 76 - Welsh Metrical Psalms by Morris Williams 1850

1Enwog yn Judah lân yw Duw,

Ei Enw yn Israel uchel yw,

2Yn Salem mae ei babell bur:

Bryn Sïon yw ei drigfod Ef,

3Lle torrodd rym y darian gref,

Y frwydr, y cledd, a’r bwa dur.

4Mwy gogoneddus wyt a chryf

Na bryniau ’r traws anrheithwŷr hyf;

5’Speiliwyd y dewrion yn eu braw,

Cysgasant hûn yr angau du;

A’r gwŷr o nerth, er maint eu llu,

Collasant rym a nerth eu llaw.

6Duw Jacob, gan dy gerydd llym,

Y march a’r cerbyd cryf eu grym

A roed yn llonydd yn y llwch.

7Ofnadwy iawn wyt Ti, O Dduw,

A phwy o’th flaen a saif yn fyw,

Pan danio fflam dy ddigter trwch?

8Dy farn a ddaeth o’r nefoedd fawr,

A’i chlywed a wnaeth daear lawr,

Dan ofni a distewi ’n fud;

9Pan gododd Duw i farnu ei gas,

Ac i waredu yn ei ras

Yr holl rai llednais yn y byd.

10Cynddaredd dyn, O Dduw, a’th fawl;

Gweddill cynddaredd, Duw a’i tawl:

11Addêwch a thelwch iddo ’n awr;

Anrhegwch i’r Ofnadwy ’nghyd:

12Tyr ymaith yspryd mawrion byd,

Tarfa frenhinoedd daear lawr.