Lyfr y Psalmau 118 - Welsh Metrical Psalms by Morris Williams 1850

1Molwch Arglwydd nef a daear,

Da yw moli ’r Ion yn llafar;

Haeddai ’n moliant a’n clodforedd,

“Byth y pery ei drugaredd.”

2-3Hyn fo cân ei wir Israeliaid,

Tylwyth Aaron a’i offeiriaid, —

“Pery byth ei ras heb ddiwedd,

Byth y pery ei drugaredd.”

4Pawb trwy ’r byd sy ’n ofni ’r Arglwydd,

Gan ymddiried i’w raslonrwydd,

Cenwch iddo mewn gorfoledd,

“Byth y pery ei drugaredd.”

YR AIL RAN

5At Dduw esgynai ’m llef,

A’m dolef yn fy loes;

Yr Arglwydd Dduw a’m clybu ’n wir,

Mewn eang dir fe ’m rhoes.

6Duw immi ’n blaid a gaf,

Nid ofnaf a wna dyn;

7Yr Ion a’m nertha ’n gryf â’i ras,

Gorchfyga ’m cas bob un.

8Gwell yw rhoi cred yn Nuw

Nag mewn dyn byw na’i hil;

9Gwell yw gobeithio yn yr Ion,

Nag mewn t’wysogion fil.

Y DRYDEDD RAN

10Daeth arnaf holl genhedloedd byd,

A’u bryd i’m gwneud yn anrhaith;

Er hyn yn Enw ’r Arglwydd Naf

Myfi a’u torraf ymaith.

11Daethant o’m hamgylch oll ynghŷd

A’u creulon fryd yn ddiffaith;

Er hyn yn Enw ’r Arglwydd Naf

Myfi a’u torraf ymaith.

12Daethant o’m cylch fel gwenyn mân, —

Diffoddodd tân eu goddaith;

Canys yn Enw ’r Arglwydd Naf

Myfi a’u torraf ymaith.

Y BEDWAREDD RAN

13Gwthiaist fi i lawr, fy ngelyn cas,

Ond Duw o’i ras a’m nerthodd:

14Yr Arglwydd yw fy nerth a’m cân,

Im’ iechyd glân fe roddodd.

15Llef lawen iachawdwriaeth sy

Yn nedwydd dŷ y duwiol:

Deheulaw gref alluog Ner

A wnaeth rymmusder nerthol.

16Dyrchafwyd llaw ein Harglwydd cu

Uwchlaw pob gallu bydol;

Deheulaw gref alluog Ner

A wnaeth rymmusder nerthol.

17Ni byddaf farw, ond byw a gaf,

A thraethaf waith Duw ’n helaeth;

18Gan gospi ’n llym fe ’m cospodd i,

Ond ni ’m rhoes i farwolaeth.

19Agorwch byrth yr Arglwydd Ner,

Sef pyrth cyfiawnder, immi;

Af i mewn iddynt byth i fyw,

I ganmol Duw a’i foli.

20Dyma dy borth, fy Arglwydd Ion,

Y cyfion oll ant iddo:

21Molaf Di am dy iechyd clau,

Ac am i’th glustiau ’m gwrando.

Y BUMMED RAN

22Y maen a lysodd gweithwŷr byd,

Yn ben i’r gongl er hynny ’r aeth;

23Mae’n rhyfedd yn ein golwg ni,

O’r Arglwydd Ior ei Hun y daeth.

24O dyma ’r dydd a wnaeth ein Duw,

Dydd hyfryd o lawenydd mawr:

25Achub yn awr, attolwg, Ion,

Attolwg, par in’ lwydd yn awr.

26A ddêl yn Enw ’r Arglwydd Ner,

Mor ddedwydd, mor fendigaid yw!

Boed byth yn gorphwys ar eich pen,

Fendithion fyrdd o Dŷ ein Duw.

27Duw yw ein Harglwydd, Ef yw ’n Haul,

Llewyrcha ’i belydr inni ’n awr;

Rhwymwch â rhaffau ’r aberth hedd

Wrth loywon gyrn yr Allor fawr.

28Ti wyt fy Nuw, moliannaf Di,

Dyrchafaf Di, fy Nuw di‐lyth.

29Molwch yr Arglwydd, can’s da yw,

Ei ryfedd ras a bery byth.