Lyfr y Psalmau 69 - Welsh Metrical Psalms by Morris Williams 1850

1Achub, Arglwydd; daeth y dyfroedd

Dig hyd at fy mywyd cu;

2Mewn tom dwfn a llaid y soddais,

Yn nyfnderau ’r dyfrllif du:

Chŵydd y ffrwd a lifodd drosof;

3Blin yw ’m calon gan fy llef:

Sych yw ’m genau, palla ’m llygaid,

Tra ’rwy ’n disgwyl wrth Dduw nef.

4Gwallt fy mhen nid yw gynnifer

A’m gelynion cedyrn cas;

Mewn casineb traws heb achos

Y difethent fi dy was:

Telais yr hyn ni chymmerais: —

5Gwyddost, Ion, f’ ynfydrwydd i;

Ac ni chuddiwyd un o’m beiau

Rhag d’ olygon dwyfol Di.

6Na warthrudder neb o’m plegid

Sydd â’i obaith ynot Ti;

O Dduw Israel, na warthrudder

Neb a’th gais, o’m plegid i:

7Er dy fwyn y töwyd f’ wyneb

A’r gwaradwydd hwn ar gam;

8Dïeithr ydwyf gan fy mrodyr,

Estron wyf gan blant fy mam.

9Zel dy Dŷ a’th sanctaidd Gafell

Ysodd weithian f’ enaid i;

Ië, syrthiodd arnaf, Arglwydd,

Warthrudd dy warthruddwŷr Di:

10Pan ymprydiais mewn wylofain,

Gwawd oedd im’ a gwarthrudd mwy;

11Gwisgais lïain sach am danaf,

Mwyfwy y’m gwatworent hwy.

12Llunient yn y porth i’m herbyn

Chwedlau gau o wawd a gwarth;

Testun cân i’r meddwon oeddwn,

Gwawd a’m toai o bob parth.

13Ond er hyn fy ngweddi beunydd

Sydd yn esgyn at fy Nuw;

Tra bo ’n amser cymmeradwy,

Arglwydd Ior, fy ngweddi clyw.

YR AIL RAN

Yn ol amledd dy raslonedd,

Arglwydd, gwrandaw ar dy was,

Yngwirionedd a ffyddlondeb

Iachawdwriaeth fawr dy ras:

14Gwared f’ enaid o’r rhyferthwy,

Fel na soddwyf yn y dom;

Gwared fi o’r dwfn lifeiriant,

Ac oddi wrth fy ngelyn ffrom.

15O na ffrydied y llifeiriant

Chwyrn a chwyddawg drosof, Ior;

Ac na lyngced gwangc y tonnau

Mo’nof i ddyfnderau ’r môr:

Ac na chaued pydew ’r eigion

Safn ei ymchwydd arnaf byth: —

16Clyw fi, Arglwydd, clyw fi ’n cwynfan;

O mor dda yw ’th ras di‐lyth!

Yn ol llïaws dy drugaredd

Edrych arnaf yn dy ras;

17Ac na chuddia ’th nefol wyneb,

Ond tywynned ar dy was:

Dydd o galed ing sydd arnaf,

Brysia, brysia, gwrando fi;

18Nesâ attaf i’m gwaredu,

Rhag fy ngelyn clyw fy nghri.

19Duw, adwaenost Ti ’m gwaradwydd,

Gwyddost Ti fy ngwawd a’m gwarth;

Ger dy fron i gyd yn amlwg

Mae ’m gelynion o bob parth:

20Gwarth a phoen a dorrai ’m calon,

Tra disgwyliais yn fy mraw

A oedd neb i weini cysur; —

Safai pob cysurwr draw.

Y DRYDEDD RAN

21Bustl a roddasant yn fy mwyd,

A finegr yn fy syched tost;

22Am hyn bo ’u bwrdd yn fagl o’u blaen,

A’u tramgwydd fyddo ’u llwydd a’u bost.

23Tywylla ’u llygaid yn dy farn,

A phar i’w llwynau grynu mwy;

24Dy sorriant tywallt arnynt oll,

Cyrhaedded llid dy ddigter hwy.

25Eu preswyl fyddo byth yn wag,

(Cartrefle trais a melldith yw;)

Ac na foed neb o oes i oes

O fewn eu pebyll byth yn byw.

26Oblegid erlidiasant ef,

I’r hwn y rhoisit eisoes glwy’;

Am boen dy glwyfedigion Di

Yn ysgafn y chwedleuant hwy.

27Dod bechod at eu pechod hwy,

Na ddelont i’th urddasol fraint;

28Dilëer hwynt o lyfr y byw,

Ac na’s cyfrifer gyd â’r Saint.

Y BEDWAREDD RAN

29Minnau, fy Nuw, wyf drist a gwan,

A phoenus dan eu traha;

Ond o gaethiwed trais a cham,

Dy iechyd a’m dyrchafa.

30Ar gân y molaf Enw ’r Naf,

Mawrygaf e’ ’n wastadol;

31A gwell fydd hynny gan yr Ion

Nag eidion corniog, carnol.

32Pan welo ’r truain hyn yn iawn,

Bydd gyflawn eu llawenydd;

Os ceisiwch chwithau ’r Arglwydd Dduw,

Cewch felly fyw ’n dragywydd.

33Oblegid gwrendy Duw o’r nef

Ar gŵyn a llef y tlodion;

Ac nid dïystyr ganddo gais

Na llef na llais ei gaethion.

Y BUMMED RAN

34Y nefoedd fry a’r ddaear lawr

A’r eigion mawr a’i donnau,

A phob dim oll sydd yno ’n byw,

Moliannant Dduw y duwiau.

35Fe achub Duw ei Sïon glau,

Fe gyfyd gaerau Judah;

Meddianna ’i bobl Ef hi ’n ddi‐lyth,

Bydd iddynt byth yn drigfa.

36Ei weision Ef a’u happus hil

A’u heppil a’u meddiannant;

A’r rhai sy’n caru ’r Arglwydd Rhi,

Byth ynddi hi preswyliant.