Lyfr y Psalmau 90 - Welsh Metrical Psalms by Morris Williams 1850

1Duw, buost in’ o oes i oes

Yn unig breswyl yn y byd;

O oes i oes Ti ’n unig yw

Ein trigfa gref a’n cartref clyd.

2Cyn llunio mynydd, maes, na môr,

Cyn ffurfio seiliau daear lawr,

O drag’wyddoldeb Ti wyt Dduw,

Wyt Dduw hyd drag’wyddoldeb mawr.

3Troi, O Arglwydd, ddyn i ddistryw,

Yno y troi y doeth a’r ffol;

A dywedi, “Feibion dynion,

Deuwch i’ch priddellau ’n ol.”

4Beth yw yspaid mil o flwyddi

Yn dy olwg Di, O Dduw?

Megis doe, ar ol ei ddarfod,

Megis darn o noson yw.

5Ffrwd dy lif a’u dwg hwynt ymaith,

Hunant yn yr angau du;

Er eu gweled y boreuddydd

Fel llysieuyn irlas cu:

6Oh mor hardd ei dwf y bore!

Oh mor lwys ei flod’yn llawn!

Min y bladur lem a’i meda,

Gwywa ’i degwch y prydnhawn.

7Yn dy ddigter Di ’n difethwyd,

Yn dy lid y darfu ’n grym;

8Rhoist ein hanwireddau dirgel

Yngoleuni ’th wyneb llym:

9Dydd anwadal byr ein bywyd

Gan dy ddig yn ddiddym troes;

Fel adroddiad ofer chwedlau

Treulio wnaethom flwyddi ’n hoes.

10Deg a thrugain mlwydd o ddyddiau

Yw ’n berr enioes yn y byd;

Os o gryfder cawn ddeg eraill,

Blinder yw eu nerth i gyd;

Ebrwydd y diflanna ’r yspaid,

Ymaith yr ehedwn ni: —

11Pwy a edwyn nerth dy sorriant?

Fel mae ’th ofn, mae ’th ddigter Di.

12Dysg ni, Ner, fel hyn i gyfrif

Dyddiau ’n berr‐oes yn y byd,

Fel y byddo ’n ddoeth ein calon: —

13Dychwel, Arglwydd Dduw, pa hyd?

Edifara o ran dy weision,

14Dy ras yn fore i’n henaid moes,

Fel y caffom orfoleddu

Mewn llawenydd ddyddiau ’n hoes.

15Yn ol hir flynyddau ’n cystudd,

Yspaid oes o ddrygfyd maith,

16Llawenycha ni, a dangos

I ni a’n plant d’ ogoned waith;

17Gweler coron dy brydferthwch

Arnom, Arglwydd Dduw ein Rhi;

Trefna waith ein dwylaw ynom,

Gwaith ein dwylaw trefna Di.