Lyfr y Psalmau 62 - Welsh Metrical Psalms by Morris Williams 1850

1Wrth Dduw disgwyliaf yn ddi‐ball,

Ac nid wrth arall ond Efe;

I mi mewn cyflwr caeth y daw

Fy iachawdwriaeth o Dduw ne’.

2Efe fy nghraig yn unig yw,

Fy iechyd ydyw Arglwydd nef;

Efe yw f’ amddiffynfa wir,

Ni ’m mawr ysgogir ynddo Ef.

3Pa hyd y ceisiwch, yn eich brad,

Aflwydd yn erbyn gwr yn awr?

Lleddir chwi oll; a’r Ion a’ch gwna

Fel gwal neu fur ar syrthio i lawr.

4Eu hunig gyngor yw pa fodd

I’w ddwyn i lawr o’i urddas fry:

Hoffant y gau; eu gwên sy rith,

Melldith sydd yn eu calon ddu.

YR AIL RAN

5Wrth Dduw disgwyliaf yn ddi‐ball,

Ac nid wrth arall ond Efe:

Gosodais, (ac ni’m siommir chwaith,)

Fy unig obaith yn Nuw ne’.

6Efe fy nghraig yn unig yw

Fy iechyd ydyw Arglwydd nef;

Efe yw ’m hamddiffynfa wir,

Ni ’m mawr ysgogir ynddo Ef.

7Yn Nuw mae’m hiachawdwriaeth fawr,

Fy urddas a’m gogoniant yw;

Fy nghadarn graig, fy noddfa gref,

Yw sanctaidd Enw ’r Arglwydd Dduw.

8Chwychwi, drigolion byd, bob awr

Gobeithiwch yn ei Enw gwiw;

Eich calon oll, heb rith, o’i flaen

Tywelltwch; noddfa ’n henaid yw.

Y DRYDEDD RAN

9Geudab yw bonedd daear lawr,

Gwagedd yw gwerin wael y byd;

Ysgafnach wrth eu pwyso ’n deg

Na ’r gwegi gwaelaf ŷnt i gyd.

10Na roddwch gred ar drais na cham,

Na fyddwch ofer ynddynt mwy;

Os cewch oludoedd fwy na rhif,

Na rowch eich calon arnynt hwy.

11Unwaith llefarodd genau ’r Ion,

Dwywaith y clywais hyn o’r ne’,

Mai “Eiddo Duw yw grym a nerth,

Nad neb galluog ond Efe.”

12Tydi a bïau ’r nerth a’r grym,

A gras sy ’n eiddot, Arglwydd Rhi;

Cyfiawnder hefyd eiddot yw,

Ei waith i bawb a deli Di.