Lyfr y Psalmau 56 - Welsh Metrical Psalms by Morris Williams 1850

1Duw, trugarhâ wrth f’ enaid gwan;

Fe ’m llyngcai dyn yn llwyr o’r byd;

Drwy drais bob dydd fy mlino mae,

Gan ymladd mewn gelynol fryd.

2Fy nghas elynion sy bob dydd

Yn gwylied am fy llyngcu ’n fyw;

Llaweroedd sy ’n rhyfela ’n chwyrn

I’m herbyn, y Goruchaf Dduw.

3Yn enbyd ddydd yr ofn a’r braw,

Hyderaf, Arglwydd, ynot Ti:

4Yn Nuw y molaf air ei ras;

Nid ofnaf a wnel dyn i mi.

5Cam‐ddeall, Arglwydd, a gwyrdrôi

Fy symlaf eiriau maent bob dydd;

Eu hamcan oll a’u bwriad gau

Er drwg a brad i’m herbyn sydd.

6Ymgasglant, llechant oll ynghyd,

Fel mewn rhyw gilfach dywyll ddu,

I wylied ffyrdd a chamrau ’m traed,

Wrth ddisgwyl am fy enaid cu.

7A gânt hwy trwy eu twyll a’u brad

Ddïangc a ffoi, O Arglwydd mawr?

Na! dymchwel y cenhedloedd hyn

Ym mhoethder llym dy lid i lawr!

8Rhifaist fy symmudiadau oll,

Fy aml grwydriadau yn y byd:

Mae ’m dagrau yn dy gostrel Di;

Maent yn dy lyfr ar lawr i gyd.

9Y dydd y llefwyf arnat, Ion,

Fe ffy ’m gelynion ymaith;

Gwn hyn, am dy fod gyd â mi,

Fy Nuw, fy Rhi, fy ngobaith.

10Yn Nuw y molaf byth ei air,

Yn Nuw ei air a folaf;

11Nid ofnaf allu marwol ddyn,

Yn Nuw ei Hun hyderaf.

12Mae arnaf itti, Arglwydd Ner,

Oes, lawer gwir adduned;

Talaf it’ foliant gwir, fy Nuw,

Dy foliant yw fy nyled.

13Gwaredaist f’ enaid rhag y bedd,

A’m traed mewn hedd rhag llithro;

Fel hyn yngolau y rhai byw

Ger bron fy Nuw caf rodio.