Lyfr y Psalmau 74 - Welsh Metrical Psalms by Morris Williams 1850

1Pa’m dros byth y’n bwriaist ymaith

Yn dy sorriant, Arglwydd Cun?

Pa’m y myga’th lid yn erbyn

Praidd dy borfa lwys dy Hun?

2Cofia ’th bobl a brynaist unwaith,

Llwythau ’th etifeddiaeth wiw;

Cofia sanctaidd fynydd Sïon,

Ior, lle buost gynt yn byw.

3Gwel ni ’n anrhaith yn wastadol,

Ion, a dyrcha ’th draed ar frys;

Gwel y drygau oll a wnaethpwyd

Gan y gelyn yn dy Lys.

4Rhuo mae gelynion d’ Enw

Ynghynteddau glân dy Dŷ;

Codant eu banerau beilchion

Fel arwyddion oddi fry.

5Hynod oedd y celfydd weithiwr

Gynt a dorrai goed i lawr

Mewn dyrys‐wig, gan eu naddu

Yn gywrain Lys i’th Enw mawr.

6Ond yn awr chwilfriwia ’r gelyn

Hardd gerfiadau Sïon lân;

Ergyd bwyill a morthwylion

Sy ’n eu darnio ’n ddrylliau mân.

7Gwnaethant goed dy Gafell sanctaidd

Oll yn ulw yn y tân;

Halogasant hyd y sylfaen

Hardd breswylfa ’th Enw glân.

8“Cyd‐ddistrywiwn hwynt heb arbed,”

Meddant yn eu calon drwch;

Felly synagogau ’r Arglwydd

A losgasant oll yn llwch.

9Oh! ni’s gwelwn mo ’n harwyddion,

Nid oes etto brophwyd mwy!

Nid oes gennym neb all ddirnad

Pa hyd y pery hyn yn hwy!

10Duw, pa hyd y gwawdia ’r gelyn,

Gan warthruddo ’n hwyneb ni?

Ai dros byth y cabla ’i enau

Aflan d’ Enw sanctaidd Di?

YR AIL RAN

11Paham y tynni ’n ol dy law,

Sef dehau law dy gryfder?

O’th fynwes tyn hi allan, Ion,

I’n hachub o’n cyfyngder.

12Canys Tydi, fy nerthol Ior,

Yw ’m Brenhin o’r dechreuad;

Gweithio ’r wyt iachawdwriaeth fawr

Yn naear lawr yn wastad.

13Ti, Arglwydd, trwy y cryfder tau,

Y môr yn ddau a holltaist;

A phennau dreigiau trwch di‐rif

Ar donnau ’r llif a ddrylliaist.

14Ti ddrylliaist ben Lefiathan,

Fe drengodd dan y dyrnod;

I bobl yr anial ar y traeth

Y rhoist e’ ’n lluniaeth parod.

15Holltaist y graig, a’r dwfr o’i bron

Ffynhonnai ’n afon loywlif;

Sychaist afonydd cryfion certh,

Dyspyddaist nerth eu cenllif.

16Ti pïau ’r nos, Ti pïau ’r dydd,

Ti yw eu Trefnydd hefyd;

Yr haul a barottoaist Ti,

A’r pur oleuni hyfryd.

17Ti, â therfynau dydd ac awr,

Y byd cwmpasfawr cylchaist;

Tydi a ffurfiaist hinon haf,

Ac oerder gauaf lluniaist.

Y DRYDEDD RAN

18O cofia hyn, ein Harglwydd cu,

I’r gelyn gablu ’n chwerw;

Cofia i’r bobloedd ynfyd ffol

Ddifenwi ’th ddwyfol Enw.

19O na ddod enaid addfwyn pur

Dy durtur i’w chaseion;

Na ad yn anghof, Arglwydd da,

Byth mo gymmanfa ’r tlodion.

20O edrych ar gyfammod gwir

Dy enau geirwir, Arglwydd;

Mae tywyll fannau ’r byd yn llawn

O ffauau creulawn celwydd.

21Na throer yn ol y rheidus gwan

A’i wyneb dan waradwydd;

Y truan tlawd molianned byth

Dy Enw dilyth dedwydd.

22Cyfod, O Dduw ein clod a’n mawl,

A dadleu ’th hawl dragywydd;

A chofia ’r gwawd a deifl y ffol

I’th wyneb grasol beunydd.

23Na ad yn anghof lais dy gas,

Na bloedd dy ddiras elyn;

Eu dadwrdd dringo i fynu bydd

O ddydd i ddydd i’th erbyn.