Lyfr y Psalmau 132 - Welsh Metrical Psalms by Morris Williams 1850

1Cofia, O Arglwydd, yn dy ras,

Dy ffyddlon was, dy Ddafydd;

Ei amryw bryder cofia Di,

Oedd yn ei boeni beunydd.

2Y modd y d’wedodd wrth Dduw Dad,

A’i lw ’n sicrhâd i’w eiriau;

A’r modd y gwnaeth adduned wiw

I rymmus Dduw ei dadau: —

3“I’m pabell nac i’m tŷ nid af,

Ni ddringaf ar fy ngwely,

4Ni chaiff fy llygaid hûn i’w cau,

Ni chaiff f’ amrantau gysgu;

5“Hyd oni chaffwy ’n gyntaf le

I’m Duw yn gartre’ i drigo,

I Arglwydd Jacob, rymmus Ri,

Fo ’n addas i breswylio.”

6Ni glywsom, wedi chwilio ’n hir,

Yn Ephrath dir am dani;

Ym maes y coed, mewn cyflwr gwael,

Y cawsom afael arni.

YR AIL RAN

7O deuwch, awn i’w bebyll Ef,

A llafar oslef canwn;

Ger bron ei droedfaingc fore a nawn

Yn ufudd iawn ymgrymmwn.

8A chyfod Dithau, Arglwydd Rhi,

I’th babell i orphwyso;

Trig byth yn hon âg arch dy nerth,

Cei foliant prydferth yno.

9Cyfiawnder pur, ac nid ei rith,

Fo ’n wisgoedd i’th Offeiriaid;

A’th Saint fo ’n orfoleddus iawn,

O gysur llawn fo ’u henaid.

Y DRYDEDD RAN

10Er mwyn dy lw i’th ffyddlon was

Dafydd, o’th ras trugarog,

Edrych, O Arglwydd, â gwedd gu,

Dan wenu, ar d’ Enneiniog.

11I Ddafydd gynt y tyngodd Duw,

Mae’n ffyddlon i’w gyflawni, —

“O ffrwyth dy gorph gosodaf Fi

Ar d’ orsedd i reoli;

12“Os ceidw ’th blant yr addysg mau

A’m cyfammodau beunydd,

Ar d’ orsedd gadarn plant eu plant

Eisteddant yn dragywydd.”

Y BEDWAREDD RAN

13Chwennychodd Duw byrth Sïon lân

Yn ddewis drigfan iddo;

14A hoffodd ei chynteddau glwys

I orphwys a phreswylio.

15“Fy mendith nefol,” meddai Naf,

“A roddaf ar ei bara;

A chaiff ei thlodion gweiniaid gwael

O luniaeth hael eu gwala.

16“Mi wisgaf eu hoffeiriaid oll

A’m hiechyd, digoll fwyniant;

A’i Saint fy moliant yn ddi‐lyth

Dan ganu byth a ganant.

17“A pharaf fod, (ac felly bydd,)

Corn Dafydd yn flagurog;

Darperais lamp na ddiffydd ddim

Yn llewyrch i’m Henneiniog.”

18A’i holl elynion o bob parth

Gwisgaf a gwarth yn amdo;

Ac ar ei ben bydd, ger fy mron,

Ei goron yn blaguro.