Lyfr y Psalmau 135 - Welsh Metrical Psalms by Morris Williams 1850

1O Molwch Enw ’r Arglwydd Ion;

Ei weision, molwch fyth eich Rhi,

2Chwychwi sy ’n sefyll yn nhŷ Dduw,

Ynglân gynteddau ’n Harglwydd ni.

3Canmolwch fyth yr Arglwydd Ion,

Da, grasol, a daionus yw;

Mae ’n hyfryd canu clod ei ras,

O seiniwch fawl i Enw Duw.

4Yr Ior detholodd Israel lân

Yn brïodoriaeth iddo ’i Hun.

5Mi wn mai mawr ac uchel iawn

Goruwch y duwiau yw ’n Duw Cun.

6A fynnodd yn uchelder nef

A wnaeth deheulaw ’r Arglwydd Ior,

Ar wyneb eang daear las,

Ac yn nyfnderoedd eigion môr.

7Mae ’n codi tarth o eithaf byd,

Y mellt a wnaeth ynghŷd â’r gwlaw;

Ac o drysorfa ’r nefoedd fry

Mae ’n dwyn y corwỳnt yn ei law.

8Tarawodd gynblant gwlad yr Aipht,

Yn ddyn a milyn, yn ei rym;

9Ar Pharaoh a’i holl weision balch

Anfonodd ei arwyddion llym.

10Tarawodd lawer cenedl ffrom,

A lladdodd lawer brenhin cryf;

11Ca’dd Og a Sehon deimlo ’i gledd,

A Chanaan a’i brenhinoedd hyf.

12Eu tir i’w Israel lân ei Hun

Yn brïod etifeddiaeth rhoes;

13Dy Enw, O Dduw, a bery byth,

Dy goffa a wnawn o oes i oes.

14Yr Arglwydd barnu ’n iawn a wna,

Yn iawn fe farna ’r eiddo;

A rhag i’w weision deimlo ’i fâr

Fe fydd edifar gantho.

15Delwau ’r bobloedd ŷnt aur o’r tân,

Ac arian wedi ei gerfiaw;

Dych’myga ’u tyb yr Arglwydd Ion

Yn waith eiddilon ddwylaw.

16Eu genau sydd o gostus fri,

Er hynny ni lefarant;

Ac fyth y tremia ’u llygaid sỳn,

Ond dim er hyn ni’s gwelant.

17Ni chlyw eu clustiau floedd na chri,

A’u genau ni anadlant:

18Tebyg i’r rhai’n yw pawb a’u gwna,

Ac ynddynt a ’mddiriedant.

19Tŷ Israel, molwch ein Duw Ion,

Tŷ Aaron, Ef bendigwch;

20Tŷ Lefi, a’r rhai a’i hofnwch Ef

Arglwydd y nef clodforwch.

21Bendithier byth yr Arglwydd Ner

O Sïon ber ei hanthem;

Canmolwch Ef o ddydd i ddydd,

Ei drigfa sydd yn Salem.