Lyfr y Psalmau 144 - Welsh Metrical Psalms by Morris Williams 1850

1Bendigaid fyddo ’m Harglwydd Ner,

Fy nghryfder i’r ymladdfa;

Mae ’n dysgu ’m llaw i drin y cledd,

A’m bysedd i ryfela.

2Fy nefol obaith a’m nawdd yw,

Fy nhŵr, fy Nuw, f’ ymgeledd;

Darostwng Ef fy mhobl i mi,

A chyfyd fri fy ngorsedd.

3Pa beth yw dyn, O Arglwydd Ior,

It’ roi ’r fath ragor arno?

Beth yw mab dyn, pan wneit yn awr

Gyfrif mor fawr o hono?

4Fel gwagedd gwael yw pob dyn byw,

A diddym yw ei ddiwrnod;

Ei ddiwedd buan ar fyr dro

Sy fel pan gilio cysgod.

YR AIL RAN

5Gostwng dy nefoedd, Ion, yn awr,

Disgyn i lawr i farnu;

A chyffwrdd â mynyddoedd byd

Nes bônt i gyd yn mygu.

6Gwasgar d’ elynion oll yn glau,

Gyr fellt yn saethau digllon;

Ergydia ’th saethau yn y tir

I ddifa ’r anwir ddynion.

7Anfon o’r nefoedd fry dy law,

Dy gref ddeheulaw gyfion,

A gwared fi o’r llif â’th ras,

O ddwylaw cas plant estron.

8Y rhai y traetha ’u genau gau

Wageddus eiriau ofer;

Y rhai y mae eu dehau law

Yn wag ddeheulaw ffalsder.

9Canaf gân newydd i Dduw Naf,

Ar fy mhereiddiaf dannau,

Ar y ber nabl a’r degtant mwyn,

A nefol swyn ei seiniau.

10Fe weryd Ef frenhinoedd byd

A nerth ei iechyd nefol;

A’i was, sef Dafydd, rhag y bedd

A min y cledd niweidiol.

Y DRYDEDD RAN

11Duw, gwared fi â’th rymmus law

O ddwylaw meibion estron;

Eu genau sydd o rith yn llawn,

A’u dehau ddwylaw ’n ffeilsion.

12Fe dyf ein meibion felly ’n llon

Fel planwŷdd tirfion irlas;

A’n merched fel congl‐feini nadd

Sy ’n harddu neuadd palas:

13Ein celloedd fydd yn llawn o faeth

A phob rhyw luniaeth beunydd;

A’n praidd cyfebron yn dwyn mil

A milfil yn ein meusydd.

14Bydd hefyd felly ’n hychen ni

Yn gryfion i lafurio;

A’n ’strydoedd heb na chlwyf na phla,

Na gwaeddi na chaethiwo.

15Mae dedwydd wynfyd oddi fry

I’r rhai mae felly arnynt;

Ond mwy o wynfyd yw a llwydd

Bod Duw yn Arglwydd iddynt.