Lyfr y Psalmau 57 - Welsh Metrical Psalms by Morris Williams 1850

1Trugaredd, Arglwydd, dod i’th was,

Moes iddo ’th ras, pan alwo;

Oblegid, Arglwydd, ynot Ti

Mae f’ enaid i ’n gobeithio.

Ynghysgod dy adenydd Di,

Fy Arglwydd Rhi, gobeithiaf;

Danynt, nes pasio ’r aflwydd hyn,

Heb ddychryn yr ymguddiaf.

2Mi alwaf ar yr Uchel Dduw,

Ac Yntau clyw fy ngalwad;

Er mwyn cwblhâu â mi ei air,

I’m gweddi pair attebiad.

YR AIL RAN

3Rhag gwarth yr hwn a’m llyngcai ’n fyw

Y denfyn Duw i’m gwared;

Ei wir drugaredd enfyn Ef

I’w was o’r nef i wared.

4Fy ofnog enaid sydd yn bod

Ynghanol llewod creulon;

’Rwy ’n gorwedd gyd â dynion byd,

Sy â’u geiriau i gyd yn boethion.

Mae ffyrnig ddannedd y rhai hyn

Yn waywffyn a saethau;

A chleddyf treiddiol, llym ei fin,

Yw iaith eu blin dafodau.

5Ymddyrcha ’n uchel, Arglwydd Ner,

Uwchlaw uchelder nefoedd;

A bydded dy ogoniant ar

Y ddaear a’i hamgylchoedd.

6Crymmwyd fy enaid: — rhwyd i’m traed,

Wrth geisio ’m gwaed, a wnaethant;

Cloddiasant bydew immi ’n ffol,

I’w ganol hwy syrthiasant.

Y DRYDEDD RAN

7Parod yw ’nghalon, parod iawn

Yw ’nghalon lawn a helaeth;

Deffro, fy hoff ogoniant gwiw,

A chân i Dduw ganmoliaeth.

8Deffro, fy nabl, a’r delyn fwyn,

Deffrôed holl swyn eich seiniau;

Deffroaf finnau ’n fore iawn

I ddeffro dawn eich tannau.

9O Dduw, clodforaf Di ’n ddi‐goll

Ym mysg yr holl genhedloedd;

Canmolaf Di â llawen fryd

Ger bron y byd a’i bobloedd.

10Mawr yw ’th drugaredd, Arglwydd da,

Hyd eitha ’r wiwnef lwyswen;

A’th bur wirionedd uwch y byd

A gyrraedd hyd yr wybren.

11Ymddyrcha ’n uchel, Arglwydd Ner,

Uwchlaw uchelder nefoedd,

A bydded dy ogoniant ar

Y ddaear a’i hamgylchoedd.