Lyfr y Psalmau 108 - Welsh Metrical Psalms by Morris Williams 1850

1Parod yw ’nghalon, parod iawn

Yw ’nghalon lawn a helaeth;

Deffro, fy hoff ogoniant gwiw,

A chân i Dduw ganmoliaeth.

2Deffro, fy nabl a’r delyn fwyn,

Deffrôed holl swyn eich seiniau;

Deffroaf finnau ’n fore iawn

I ddeffro dawn eich tannau.

3O Dduw, clodforaf Di ’n ddi‐goll

Ym mysg yr holl genhedloedd;

Canmolaf Di â llawen fryd

Ger bron y byd a’i bobloedd.

4Mawr yw ’th drugaredd, Arglwydd gwâr,

Hyd eitha ’r wiwnef lwyswen;

A’th bur wirionedd uwch y byd

A gyrraedd hyd yr wybren.

5Ymddyrcha ’n uchel, Arglwydd Ner,

Uwchlaw uchelder nefoedd;

A bydded dy ogoniant ar

Y ddaear a’i hamgylchoedd.

6O gwared â’th ddeheulaw, Ion,

Dy blant anwylion eiddil;

A gwrando finnau ar eu rhan,

Heb oedi, pan bwy ’n ymbil.

7Yn ei sancteiddrwydd meddai Naf,

“Llonnychaf, rhannaf Sichem,

A mesur dyffryn Succoth wnaf,

Fe ’i rhoddaf i Gaersalem.

8“Mae Gilead draw yn eiddof Fi,

Manasseh i Mi sy ’n drigfa;

Ac Ephraim yw fy mhennaf wr,

A’m deddfwr ydyw Judah.

9“Golchi fy nhraed gaiff Moab ffrom,

Dros Edom f’ esgid taflaf;

A balchder gwlad Philistia gerth

Yn llwyr â’m nerth gorchfygaf.”

10Pwy ’m dwg i’r gaerog ddinas draw?

Pwy yn fy llaw a’i dyry?

Pwy im’ a ddaw ’n arweinydd mad

Hyd Edom wlad i’w threchu?

11A’i nid Tydi, yr Hwn, O Ner,

A’n tro’ist dros amser heibio,

Ac nid ait allan gyd â ’n cad

Yn Noddwr mad i’n helpio?

12O moes yn awr gynnorthwy, Ner,

Rhag ail gyfyngder inni;

Os rhoi ar ddyn ein hyder wnawn,

Gan hwnnw cawn ein siommi.

13Gwrolwaith gwych yn Nuw a wnawn,

Ei nerth a gawn i’n diffyn;

Canys efe mewn munud awr

A sathra i lawr ein gelyn.