Lyfr y Psalmau 70 - Welsh Metrical Psalms by Morris Williams 1850

1O rhynged bodd it’, Arglwydd Naf,

Dd’od attaf i’m gwaredu;

Heb oedi tyred, Ion, ar frys

O’th uchel Lys i’m helpu.

2Y rhai sy’n ceisio f’ einioes, Ner,

Gwarthrudder am eu brynti;

Gyrrer yn ol y rhai mewn gwawd

Sy ’n chwennych anffawd immi.

3Yn wobrwy am eu gwaith i gyd,

A gwawd eu coeglyd araith,

Am dd’wedyd wrthyf fi, “Ha! ha!”

Duw ’r dïal, gwna hwy ’n anrhaith.

4Llawen fo pawb a’th geisiant, Ion,

Gan garu ’th dirion iechyd;

A llafar ganant tra bônt byw,

“Mawryger Duw ein bywyd.”

5Tlawd ac anghenog wyf yn byw,

Ond meddwl Duw am danaf;

Fy mhorth a’m nodded wyt yn wir,

Nac oeda ’n hir dd’od attaf.