Lyfr y Psalmau 21 - Welsh Metrical Psalms by Morris Williams 1850

1Llawen yw’r Brenhin, Arglwydd Ner,

Yn nerth dy gryfder grymmus;

Mor hyfryd yw yn iechyd Ion

Ei galon orfoleddus!

2Rhoist iddo, Ior, yr hyn i gyd

A fynnai bryd ei galon;

Ac ni’s gommeddaist roddi ’n glau

Gais ei wefusau ffyddlon.

3Achubaist flaen ei weddi, do,

A’r gorau o fendithion;

Herddaist ef â choethedig aur,

Ei ben â rhuddaur goron.

4Gofynodd am gael gennyt oes,

A rhoist hir einioes iddo;

Oes hir a theg o ddyddiau ’n llawn

Hyd byth yw ’r ddawn sy ganddo.

5Ei urddas yn dy iechyd Di,

Sy fawr mewn bri a harddwch;

Rhoist arno ’n goron, Arglwydd da,

Ogoniant a phrydferthwch.

6Yn fendith byth y gwnaethost ef,

Bendithion nef sydd arno;

Llawenydd pur dy siriol wedd

Sy ’n llawn gorfoledd iddo.

7Gobaith y Brenhin yn Nuw sydd,

Ar Hwnnw rhydd ei hyder;

Drwy ras Goruchaf Arglwydd nef,

Nid ysgog ef un amser.

8O’th rymmus law ni ddïangc dyn

O gyndyn lu ’th gaseion;

Dy ddehau law gaiff afael ar

Ystyfnig warr d’ elynion.

9Fel ffwrnais boeth y gwnei hwy, Ner,

Yn nydd dy ddigter poethlym;

Fe ’u difa ’r Ior mewn llid a thân,

A’i ddig a’u hysa ’n gyflym.

10Ei hil a’u ffrwyth, yn fawr a mân,

O’r tir yn lân distrywi;

Eu had a’u heppil oll i gyd,

Yn llwyr o’r byd a dynni.

11I’th erbyn amcanasant ddrwg,

Mewn ofer wg, heb arswyd;

Ond llwyr fethasant ei gwblhâu,

Eu bwriad gau a rwystrwyd.

12Am hynny gwnei Di iddynt ffoi,

A phrysur droi eu cefnau;

Gosodi ’th saeth ar linyn tynn

Yn erbyn eu hwynebau.

13Ymddyrcha, Ior, yngrym dy nerth,

I’th Enw prydferth canwn;

A’th gadarn allu dan y rhod

Drwy lafar glod canmolwn.