Lyfr y Psalmau 48 - Welsh Metrical Psalms by Morris Williams 1850

1Mawr a moliannus yw Duw Ion,

Yn Sïon mae ’n Breswylydd;

Yn ninas hardd ein Harglwydd glân,

Sef yn ei burlan fynydd.

2Gem a llawenydd daear gron

Yw mynydd Sïon hawddgar;

Mae ar ei deg ogleddol fin

Dref Brenhin nef a daear.

3Yn llysoedd hon adweinir Ef

Yn noddfa gref i’r eiddo: —

4I’w erbyn daeth brenhinoedd byd,

Ond caed hwy ’nghyd yn syrthio.

5Pan welodd ei elynion hyn,

Rhyfeddu ’n syn a wnaethant;

Eu calon oedd o fraw yn llawn,

A phrysur iawn y ffoisant.

6Daeth dychryn arnynt, ofn a chur,

A phoen fel gwewyr esgor. —

7Tydi â’r gwynt dwyreiniol tau

A ddrylli longau ’r dyfnfor.

YR AIL RAN

8Fel hyn y gwelsom yn y fan,

A glywsom gan laweroedd,

Yn ninas lân ein Harglwydd byw,

Yn ninas Duw y lluoedd.

Duw a’i sicrhâ hi byth yn gref;

Yn hon ein tref y trigwn:

9Ynghanol dy gynteddau, Ner,

Am dy raslonder soniwn.

10Fel y mae d’ Enw, felly, Naf,

Mae ’th glod hyd eithaf gwledydd:

O bur gyfiawnder llawn yw ’th law,

Dy bur ddeheulaw, beunydd.

Y DRYDEDD RAN

11Llawen fo Sïon, mynydd Ion,

Bo ’n llon forwynion Salem;

O herwydd dy gyfiawnder llawn

Poed uchel iawn eu hanthem.

12Amgylchwch Sïon, ewch o’i chylch,

O’i hamgylch ogylch rhodiwch;

Ystyriwch hardd ragfuriau hon,

A’i thyrau cryfion rhifwch.

13Ar lysoedd hon ym mlaen ac ol

A llygaid manol tremiwch;

A’i threfn a’i thegwch, er ei chlod,

I’r oes sy ’n d’od, mynegwch.

14Y Duw hwn byth, ein tadol Ri,

Yw ’n Harglwydd ni yn ddilys;

Ac yn ei law ofalus gu

Hyd angau du fe ’n tywys.