Lyfr y Psalmau 65 - Welsh Metrical Psalms by Morris Williams 1850

1I Ti, O Dduw, y perthyn mawl

Yn sanctaidd Sïon fry;

Telir i Ti ’r adduned lawn

Ynghyntedd glân dy Dŷ.

2Tydi o’th ras o’r nefoedd wen

Sy ’n gwrando gweddi ’r tlawd;

Ac at dy nefol orsedd hael

Y daw pob dynol gnawd.

3Fy mhechod yn fy nghuro sydd,

A threch na’m henaid yw;

Tydi er hyn a lwyr lanhêi

Ein camwedd, Arglwydd Dduw.

YR AIL RAN

4O gwyn ei fyd y dedwydd ddyn

’Rwyt Ti ’n ei ddewis it’ dy Hun,

I’w nesu attat yn dy Dŷ:

Dy Gyssegr yw ei breswyl ef,

Cyflawn a fydd o fendith nef,

Daioni ’th sanctaidd Gafell fry.

5Trwy bethau llawn o fraw ’r wyt Ti

Yn gyfiawn yn ein hatteb ni,

Er iachawdwriaeth, Arglwydd Ior:

Gobeithio ’n llawen yn dy ras

Wna cyrrau pellaf daear las,

A’r rhai sydd ar eithafion môr.

Y DRYDEDD RAN

6Duw a sicrhâ ’r mynyddoedd mawr

Drwy rym ei ddirfawr gryfder;

Anorfod ydyw nerth ein Duw,

Ei wregys yw grymmusder.

7Gostega Duw y môr a’i dwrf,

Cynddaredd twrf ei donnau;

Gostega ’i derfysg flin a’i floedd,

A thwrf y bobloedd hwythau.

8Ofnir d’ arwyddion Di fel hyn

Hyd eithaf terfyn daear:

Gwnei derfyn bore a phrydnhawn

Yn llawen iawn a llafar.

Y BEDWAREDD RAN

9Ymweled, Arglwydd, yr wyt Ti

A’n daear ni ’n rasusol;

Dyfrhâu yr wyt ei monwes wyw

Ag afon Duw ’n fendithiol.

Mae ’th afon lawn o ddwfr â’i rhin

Yn cyfoethogi ’n daear;

Yr wyt âg ŷd, mewn grasol drefn,

Yn llenwi cefn a thalar.

10Dyfrhâu yr ydwyt rychau hon,

A mwydo ’i sychion gefnau;

Dïodi hi â’th gawod flith,

Rhoi fendith ar ei chnydau.

11Coroni ’r wyt y flwyddyn gron

A’th hael fendithion beunydd;

Difera ’th lwybrau ’r gwlaw a’r gwlith

Yn frasder blith i’r meusydd.

12Gwna ’th fendith y porfeydd yn fras,

Porfeydd y cras anialwch;

Dilledir gleision fryniau ’r fro

A gwregys o hyfrydwch.

13Gwisgir â defaid ddol a bryn,

Pob pant a dyffryn hwythau

Cuddir âg ŷd, a bloeddio wnant,

A chanant am eu ffrwythau.