Psalmau 145 - Welsh Metrical Psalms by William Middleton 1595 - Original edition

Y Psalm. CXLV. Cywydd Deuair Hirion.

1Moliannaf, medhaf, a’m min,

Mawr enwog, Dduw fy Mrenhin;

A bendithiaf, mwyaf mawl,

Gwiwdhuw, dy enw tragwydhawl.

2Beunydh, gwiw Wawdydh gwedi,

Molaf a bendigaf di;

Clodforaf byth, clod‐fwriad,

Dy enw a dysg, Duw Iôn Dad.

3Mawr wyt, Arglwydh, swydh sy hwy,

Aml o wawd, canmoladwy;

Ni ellir (chwelir) chwiliaw

Dy fawredh diryfedh draw.

4Cenedl i genedl a gan

Dy waith, e’i molwyd weithian.

5Adrodhant, anant ennyd,

Dy wirnerth, prydferth yw ’r pryd;

Myfyriant, mwy‐fwy eiriau,

Mawrglod hwnt, y miragl tau,—

Dy ogoniant ugeinwaith,—

Dy wirionedh; mawredh maith!

6D’wedant, daliant a dolef,

Dy nerth: (erchyll wyd o nef!)

Minnau draethaf, gwychaf gwedh,

Ydwyf wirion, dy fawredh.

7Mawredh, Iôn, dy dhaioni

O nef, a draethant i ni;

A chanant yn wych waneg

Dy gyfiawnder tyner, teg.

8Madheuaist, am oedh dhiwad,

Llawn dy ras, — llyna dy rad:

Mawr dy drugaredh, medhir,

Hwyr dy lid, gwypid mai gwir.

9Da wyd, Arglwydh, wiwswydh Iôn,

Dawnus, i holl blant dynion;

Mwy dy drugaredh gwedhawl

Na’th holl weithredoedh, na’th hawl.

10Dy weithred, sonied pob sant,

O fawredh, a’th glodforant;

Dynion a gais daioni,

O flaen tal, a’th folant di.

11A gogoniant, foliant fod,

Dy deyrnas, adhas eidhod;

A siaradant, llwydhiant llu,

Duw well‐well, am dy allu:

12Er dangos i wyr dawngall,

Y Nêr, dy bower diball;

Dy ogonedh teg, uniawn,

Urdhas dy deyrnas a dawn.

13Dy ras sydh yn teyrnasu

Yn dragwydhawl, dy fawl fu.

14Y gwan a thruan wrth raid,

Dy gynnal ŷnt, a gweiniaid.

15Edrychant, bwriant yn bêr,

Bob llygad arnad, Eurner;

A rhodhi fwyd, rhwydh o fawl,

I’w sirio yn amserawl.

16Di a agori, dy gariad,

Da dhal rhodh, dy dhwylaw rhad;

Rhwydh yn ol rhodhi i ni

O’th luniaeth a’th haelioni.

17Cyfion wyt, Iôr, cyfnod haul

Dy lwybrau, eiriau araul;

Trugarog, rhywiog, Iôr, oedh

(Doetha’ rad) dy weithredoedh.

18Agos beunydh, rydh rodhiad,

I bawb a’th alwo, heb wad.

19Ag yn berffaith, gwn, burffydh,

A’th ofno a fynno fydh;

Eu nad sydh gymmeradwy,

Accw Duw hael a ’n ceidw hwy.

20E geidw yn war a’i caro;

E ladh y drwg, dilwydh dro.

21Mawl ir Arglwydh, mawrlwydh mau,

Mae’i ogoniant i’m genau;

Pob cnawd a thafawd a thant,

Mael yw enw, moliannant.