Psalmet 32 - Interconfessional Albanian Bible – 2020 (66 books)（AL）

1Himn i Davidit.

Lum kujt iu fal faji,

që mëkati iu mbulua.

2Lum njeriu, që Zoti nuk e gjykon fajtor,

në shpirtin e të cilit nuk ka dredhi.

3Unë heshtja e kockat po më treteshin,

rënkoja gjithë ditën.

4Dora jote rëndonte mbi mua ditë e natë,

fuqia po më mpakej si në zhegun e verës. selah

5Atëherë të dëfteva mëkatin tim

e fajin tim nuk ta fsheha.

Thashë: «Do t'ia rrëfej paudhësitë Zotit»;

ti e fale fajin e mëkatin tim. selah

6Le të të lutet për këtë çdo besnik

në kohë mundimesh të mëdha

dhe vërshimi i ujërave përmbytës

nuk ka për ta zënë.

7Ti je vendstrehimi im,

ti më ruan prej fatkeqësisë

e me brohori shpëtimi më rrethon. selah

8«Do të të jap mençuri

e udhën, ku duhet të ecësh, do të ta mësoj,

do të të jap këshilla

e sytë mbi ty do t'i mbaj».

9Mos u bëni si kali a si mushka, që s'kanë mend,

kapistër e fre lypset për t'i mbajtur,

që mos të të afrohen.

10Të shumta janë mundimet e të paudhit,

por kush beson në Zotin rrethohet me mirësi.

11Gëzohuni në Zotin e ngazëlleni, o të drejtë!

Brohoritni të gjithë ju, o zemërdrejtë!