IsiLilo 4 - isiZulu 1959/1997

Intukuthelo kaJehova ngeJerusalema

1Yeka ukufiphala kwegolide

nokuguquka kwegolide elihle!

Amatshe endlu engcwele ahlakazekile

ezingosini zazo zonke izitaladi.

2 Amadodana anqabileyo aseSiyoni,

elingene negolide elihle,

yeka ukuthiwa kwawo ayizitsha zebumba,

imisebenzi yezandla zombumbi!

3 Namakhanka ehlisa,

ancelise amazinyane awo.

Indodakazi yabantu bami isinonya, njengezintshe zasehlane.

4 Ulimi loncelayo lunamathela

olwangeni lwakhe ngokoma.

Izingane zicela isinkwa,

kepha akakho ozihlephulelayo.

5Abakade bedla okumnandi

sebechithakele ezitaladini.

Ababekhuliswa ngokububende sebesingatha izala.

6 Ukona kwendodakazi yabantu bami

kukhulu kunesono saseSodoma

elachithwa ngokuphazima kweso,

kungasondelanga zandla kulo.

7Abakhulu balo babehlambulukile kunongqoqwane,

babe mhlophe kunobisi;

imizimba yabo yayibomvana kunekorali,*

isimo sabo sasinjengesafire.*

8Ubuso babo sebumnyama kunelahle,

abaziwa ezitaladini.

Isikhumba sabo sinamathela emathanjeni abo,

sishwabene, saba njengomuthi.

9 Babe ngcono ababebulawa

ngenkemba kunababebulawa ngendlala,

ababuna behlatshiwe ngokuswela ukudla kwensimu.

10 Izandla zabesifazane abahawukelayo

zapheka izingane zabo;

zazingukudla kwabo ngokuchithwa kwendodakazi yabantu bami.

11 UJehova ufezile ukufutheka kwakhe,

uthululile ukufutheka kwentukuthelo yakhe;

uphembile umlilo eSiyoni oqedile izisekelo zalo.

12Amakhosi omhlaba

ayengakholwa kanye nabo bonke abakhileyo ezweni

ukuthi abamelene nabo nezitha zabo

babeyakungena emasangweni aseJerusalema.

13 Kungenxa yezono zabaprofethi balo nobubi babapristi balo

ababechitha igazi labalungileyo phakathi kwalo.

14Bazulazula njengezimpumputhe ezitaladini,

bengcolile ngegazi

ngangokuba zazingenakuthintwa izingubo zabo.

15 “Chezukani, ningcolile!”

bamemeza kubo:

“Chezukani, chezukani, ningathinti!”

Lapho bebaleka bezulazula,

bathi phakathi kwabezizwe:

“Abasayikugogobala lapha.”

16Ubuso bukaJehova buyabahlakaza,

akasayikubanakekela.

Abahloniphi ubuso babapristi,

kababanga namusa kumalunga.

17Amehlo ethu ayaphela ukubheka usizo lwethu oluyize;

ekulindeni kwethu silindela isizwe esingenakusindisa.

18Bazingela izinyathelo zethu

ukuba singahambi ezigcawini zethu.

Ukugcina kwethu kuseduze,

izinsuku zethu zigcwele,

yebo, ukugcina kwethu kufikile.

19Abasixoshayo babenejubane kunezinkozi zezulu;

basizingela ezintabeni,

basiqamekela ehlane.

20 Umoya wamakhala ethu,

ogcotshiweyo kaJehova,

wabanjwa emigodini yabo,

esathi ngaye:

“Phansi kwethunzi lakhe

siyakuphila phakathi kwezizwe.”

21 Jabula, uthokoze,

ndodakazi yakwa-Edomi,

ohlala ezweni lase-Uzi.

Indebe iyakudlulela nakuwena;

uyakudakwa, uzenze nqunu.

22 Ububi bakho sebuphelile,

ndodakazi yaseSiyoni,

kasayikukuthumba.

Ububi bakho,

ndodakazi yakwa-Edomi,

uyakubuhambela,

azambule izono zakho.