Cantiglau 3 - New Metrical Psalms 2008 (Gwynn ap Gwilym)

Ti, Dduw, a folwn (Y Te Deum)Winchester New MH

1-2Tydi, O Dduw, a folwn ni.

Yn Arglwydd cydnabyddwn di.

Fe’th fawl y ddaear oll i gyd,

Cans Tad tragwyddol wyt o hyd.

3-4Holl engyl a holl nerthoedd nef

A gyfyd atat ti eu llef.

Amdanat ti’n ddi-baid y cân

Cerwbiaid a seraffiaid glân:

5-6“Y Sanctaidd, Sanctaidd, Sanctaidd Un,

Arglwydd y Lluoedd wyt dy hun.

Mae’r nefoedd fry a’r ddaear lawr

Yn orlawn o’th ogoniant mawr.”

7-8Yr apostolion, glodfawr gôr,

A llu’r proffwydi a’th fawl, ein Hiôr,

A’r holl ferthyron gwych i gyd,

A’r Eglwys sanctaidd trwy’r holl fyd:

9“Anfeidrol fawr wyt ti, O Dad,

Ac felly d’anrhydeddus Fab,

Dy wir a’th unig Fab, O Dduw,

A’r Ysbryd Glân, Ddiddanydd byw”.

10-12Ti, Grist, yw’r Brenin, Mab y Tad,

Gwaredwr byd, o’r Wyryf fad.

Pan drechaist angau a’i rym ef,

Agoraist inni deyrnas nef.

13-14Tydi sy’n eistedd yn dy le

Yn llewyrch Duw, ar ei law dde,

Yr ŷm yn credu mai Tydi

A ddaw yn Farnwr arnom ni.

15-16Gan hynny, cynorthwya’r rhai

A brynaist ti â’th waed di-fai.

Rho iddynt hwy y fythol fraint

O gael eu cyfrif gyda’th saint.

17-18Bendithia di dy bobl byth mwy,

A llywia a dyrchafa hwy.

Fe’th anrhydeddwn yn ddi-lyth,

A’th enw a glodforwn byth.

19-22Cadw ni heddiw, Arglwydd da,

Heb bechod, Arglwydd, trugarha.

Boed dy drugaredd arnom ni

Sydd yn ymddiried ynot ti.