Cantiglau 2 - New Metrical Psalms 2008 (Gwynn ap Gwilym)

Bendigedig fyddo Arglwydd Dduw Israel (Y Benedictus) Luc 1:68-79Dyfrdwy MS

1-2Duw Israel, bendigedig fo

Am iddo ymweld â'i bobol;

Ein prynu ni yn rhydd a wnaeth

Trwy waredigaeth nerthol.

3-4aTrwy enau ei broffwydi glân

Bu’n dweud amdani droeon –

Y deuai i’n gwaredu rhag

Pwy bynnag fo’n gelynion.

4b-5aFel hyn y gwnaeth drugaredd rad

Â’n tadau gynt, gan gadw

Y llw a wnaeth i Abraham

A’r glân gyfamod hwnnw:

5b-6Y dôi i’n hachub ni, rai gwael,

O afael ein gelynion

I’w wasanaethu ef yn iawn,

Yn gyfiawn ac yn ffyddlon.

7-8A thi, fy mhlentyn, byddi byw

Yn broffwyd Duw; ei lwybrau

A baratoi, a rhoi i’w blant

Faddeuant o’u pechodau.

9-10Cans Duw, yn ei drugaredd fawr,

A ddaw â'r wawrddydd olau

I bawb sy’n byw yn ofn y bedd,

A heddwch i’n heneidiau.

I’r Tad a’r Mab a’r Ysbryd Glân

Boed cân gogoniant bythol;

Fel y mae’n awr, ac fel y bu,

Y pery yn dragwyddol.