Salmau 10 - New Metrical Psalms 2008 (Gwynn ap Gwilym)

SALM 10Duw’n noddfa i’r diamddiffynLlanfair 74.74.D

1-4Pam, O Dduw, y sefi draw

Mewn cyfyngder

Pan fo’r drwg yn peri braw

Yn ei falchder?

Barus ac ymffrostgar yw

Yn ei chwantau.

Gwawdia’r Arglwydd, caeodd Dduw

O’i gynlluniau.

5-8Mae dy farnau di’r tu hwnt

I’w amgyffred.

Dywed yn ei feddwl brwnt,

“Ni chaf niwed.”

Mae’n llawn melltith, trais a gwawd

A drygioni.

Llecha’n gudd i ladd y tlawd

Mewn pentrefi.

9-12Gwylia, megis llew o’i ffau,

Am y truan,

Ac fe’i dena i’r dychrynfâu

Sy’n ei guddfan.

Dywed, “Trodd yr Arglwydd draw,

Ac ni falia.”

Cyfod, Arglwydd, cod dy law.

Nac anghofia.

13-15Pam y mae’r rhai drwg, O Dduw,

Yn dy wawdio,

Ac yn dweud o hyd, “Nid yw

Ef yn malio”?

Ond rwyt ti yn sylwi ar boen

Yr anffodus.

Cod a dryllia nerth a hoen

Y drygionus.

16-18Duw sydd frenin; blin fydd ffawd

Y cenhedloedd.

Arglwydd, clywaist gwyn y tlawd

Yn eu hingoedd.

Gwnei gyfiawnder iddynt hwy,

A’u hamddiffyn,

Ac ni chaiff meidrolion mwy

Beri dychryn.