Salmau 17 - New Metrical Psalms 2008 (Gwynn ap Gwilym)

SALM 17Cri am gyfiawnderPennant 87.87.D

1-4Rwyf yn llefain am gyfiawnder;

Dyro sylw i’m llef, a chlyw.

Gwrando gri gwefusau didwyll.

Doed fy marn oddi wrth fy Nuw.

Gwyliaist fi drwy’r nos heb ganfod

Dim drygioni ynof fi.

Ni throseddais gyda’m genau,

Ond fe gedwais d’eiriau di.

5-7Ar hyd llwybrau yr anufudd

Byddai ’nghamau’n pallu’n syth,

Ar dy lwybrau di, fodd bynnag,

Nid yw ’nhraed yn methu byth.

Gwaeddaf am dy fod yn f’ateb.

Dangos dy ffyddlondeb triw,

Ti sy’n achub â’th ddeheulaw

Bawb a’th geisia’n lloches wiw.

8-12Megis cannwyll loyw dy lygad

Cadw fi, a’m cuddio dan

Dy adenydd rhag gelynion

Sydd o’m cwmpas ym mhob man.

Bras eu calon, balch eu tafod,

Maent amdanaf wedi cau,

Bron â’m bwrw i’r llawr a’m llarpio,

Megis llew yn llamu o’i ffau.

13-15Cyfod, Arglwydd, yn eu herbyn;

Bwrw hwy i lawr i’r baw.

Gwared fi rhag y drygionus,

A dinistria hwy â’th law.

Cosba hwy, a chadw weddill

I’w babanod, wŷr di-hedd.

Ond caf fi, pan gyfiawnheir fi,

Fy nigoni o weld dy wedd.