Salmau 72 - New Metrical Psalms 2008 (Gwynn ap Gwilym)

SALM 72Gweddi am frenhiniaeth gyfiawnMorning has broken 10.9.10.9

1-3Dyro, O Dduw, dy ddeddfau i’r brenin.

Barned dy bobl a’th dlodion yn iawn,

Nes daw cyfiawnder inni o’r bryniau,

Ac o’r mynyddoedd heddwch yn llawn.

4-6Boed iddo warchod achos y tlodion.

Boed, tra bo haul, i’w linach barhau.

Bydded fel glaw yn disgyn yn gawod

Ar gnwd y ddaear i’w lwyr ddyfrhau.

7-9Hedd a chyfiawnder fo yn ei ddyddiau.

Boed ei lywodraeth o’r Afon fawr

Hyd eitha’r byd. Ymgrymed gelynion

Iddo, a llyfu’r llwch ar y llawr.

10-11Deued brenhinoedd Sheba a Seba,

Tarsis a’r holl ynysoedd i gyd

Â’u teyrnged iddo, ac ymostynged

Ger ei fron holl genhedloedd y byd.

12-14Canys tosturia wrth yr anghenus,

Ac wrth y gwan, na all achub ei hun.

Gwared y tlodion rhag trais a gormes,

Cans fe’u hystyria’n werthfawr bob un.

15-16Hir oes fo iddo. Bydded gweddïau

Drosto, a bendith arno o hyd.

Bydded i’w gnydau dyfu fel cedrwydd

Lebanon; bydded digon o ŷd.

17-19Cyhyd â’r haul parhaed ei enw’n

Fendith cenhedloedd, ac ef yn ben.

A bendigedig fyddo Duw Israel,

A’r byd yn llawn o’i fawredd. Amen.