Salmau 75 - New Metrical Psalms 2008 (Gwynn ap Gwilym)

SALM 75Disgwyl am farn DuwDowning MB

1Diolchwn iti, O Dduw,

Ac fe adroddwn ni,

Sy’n galw ar dy enw, am

Dy ryfeddodau di.

2-3“Pan ddaw yr amser, dof

I gywir farnu’r byd.

Pan dawdd y ddaear, daliaf fi

Ei holl golofnau i gyd.

4-5Dywedaf wrth y balch,

‘Na fyddwch yn drahaus’,

Ac wrth y drwg, ‘At Dduw, eich Craig,

Na fyddwch yn sarhaus’.”

6-7Ni ddaw o’r dwyrain help,

Nac o’r gorllewin chwaith,

Nac o’r anialwch, ond bydd Duw’n

Ein barnu yn ôl ein gwaith.

8Mae cwpan yn llaw Duw

Yn llawn o ddiod gref.

Fe’i rhydd i’r rhai drygionus oll,

A gwagiant hwythau ef.

9-10Ond molaf fi am byth

Dduw Jacob am ei fod

Yn tynnu y rhai drwg i lawr,

A’r cyfiawn yn cael clod.