Salmau 115 - New Metrical Psalms 2008 (Gwynn ap Gwilym)

SALM 115Rhagoriaeth ein DuwSt. Gertrude 65.65.D a chytgan

1-3Dyro di ogoniant,

Arglwydd, nid i ni,

Ond i’th enw, canys

Cariad ydwyt ti.

Pam yr hola’r gwledydd,

“Ple y mae eu Duw?”

Mae’n Duw ni’n y nefoedd;

Crëwr popeth yw.

9Israel, ymddirieda

Yn yr Arglwydd Dduw,

Cans dy gymorth parod

Di, a’th darian yw.

4-6aDuwiau y cenhedloedd,

Delwau ŷnt bob un,

Delwau aur ac arian

O waith dwylo dyn.

Y mae ganddynt enau,

Ond y maent yn fud;

Dall eu llygaid; byddar

Yw eu clustiau i gyd.

10O dŷ Aaron, credwch

Yn yr Arglwydd Dduw,

Cans eich cymorth parod

Chwi, a’ch tarian yw.

6b-8Ffroenau nad aroglant,

Dwylo na wnânt waith

Sydd i’r delwau mudion:

Traed na cherddant chwaith.

Y mae eu gwneuthurwyr

Yr un mor ddi-werth,

A phawb sy’n ymddiried

Yn eu grym a’u nerth.

11Chwi sy’n ofni’r Arglwydd,

Rhowch eich cred yn Nuw,

Cans eich cymorth parod

Chwi, a’ch tarian yw.

12-14Y mae Duw’n ein cofio,

A’n bendithio a wna.

Fe fendithia Israel

A thy Aaron dda,

A phawb sy’n ei ofni,

Boed yn fach neu’n fawr.

Amlhaed Duw chwi

Oll, a’ch plant yn awr.

15Boed i chwi gael bendith

Gan yr Arglwydd Dduw;

Crëwr mawr y nefoedd

A’r holl ddaear yw.

16-18Am y nefoedd uchod,

Eiddo’r Arglwydd yw;

Ond fe roes y ddaear

I blant dynolryw.

Ni all neb o’r meirw

Foli Duw o’u tref,

Ond nyni’n oes oesoedd

A’i moliannwn ef.

Molwch bawb yr Arglwydd,

A bendithiwch Dduw,

Cans eich cymorth parod

Chwi, a’ch tarian yw.