Salmau 140 - New Metrical Psalms 2008 (Gwynn ap Gwilym)

SALM 140Gweddi rhag gorthrwmLlantrisant 88.88

1-2aCadw fi, O Dduw, rhag pobol

Sy’n ddrygionus a gormesol,

Rhai sy’n wastad yn cynllunio

Yn eu calon ddrwg a chyffro.

2b-3Maent bob amser yn y dirgel

Yn ymbaratoi at ryfel.

Mîn fel sarff sydd i’w tafodau,

Gwenwyn gwiber eu gwefusau.

4-5Arbed fi rhag llaw’r drygionus,

Cadw fi rhag pobl orthrymus.

Cuddiodd y trahaus eu maglau

Ar fy ffordd, a gosod rhwydau.

6-7Ti yw ’Nuw, O Arglwydd grymus,

Gwrando lef fy ngweddi glwyfus.

Ti, fy nghadarn iachawdwriaeth,

Fu fy helm mewn brwydr ganwaith.

8-9Na ro iddynt eu dymuniad,

Paid â’u llwyddo yn eu bwriad.

Llethed gwenwyn eu gwefusau

Y trahaus yn eu bwriadau.

10-11Syrthied arnynt farwor tanllyd,

Bwrier hwynt i ffosydd bawlyd;

A drygioni a ymlidied

Bob gorthrymwr yn ddiarbed.

12-13Gwn y rhoddi, Dduw, gyfiawnder

I’r anghenus, tlawd bob amser.

Moli d’enw a wna y cyfiawn,

Ac yn d’ŵydd bydd byw yr uniawn.