Salmau 84 - New Metrical Psalms 2008 (Gwynn ap Gwilym)

SALM 84Llawenydd tŷ DduwGuiting Power 85.85.78

1-2Dduw y Lluoedd, dy breswylfod,

O mor brydferth yw!

Rwy’n hiraethu hyd at ddarfod

Am gynteddau Duw.

Y mae’r cwbl ohonof fi

Yn gweiddi am yr Arglwydd byw.

3-4Adar to, a’r wennol dirion

A gânt yno nyth;

Wrth d’allorau magant gywion.

Gwyn eu byd am byth

Bawb sy’n trigo yn dy dŷ,

Yn canu mawl i ti’n ddi-lyth.

5-7Gwyn eu byd y pererinion;

Cedwi hwy rhag braw.

Fe gânt ddyffryn Baca’n ffynnon

Dan y cynnar law.

Ânt o nerth i nerth, nes dod

I wyddfod Duw yn Seion draw.

8-10aArglwydd Dduw y Lluoedd, gwrando

Ar fy ngweddi i.

Edrych ar ein tarian; dyro

Ffafr i’n brenin ni.

Gwell na blwyddyn gartref fydd

Un dydd yn dy gynteddau di.

10b-12Gwell yw sefyll y tu allan

Yno na chael byw

Yn nhai’r drwg; cans haul a tharian

Yw yr Arglwydd Dduw.

Gwyn ei fyd y sawl y bo

Ei hyder ynddo; dedwydd yw.