Salmau 44 - New Metrical Psalms 2008 (Gwynn ap Gwilym)

SALM 44Cwyn cenedl orchfygedigWhitford 76.76.D

1-2Fe glywsom gan ein tadau,

O Arglwydd, am y gwaith

A wnaethost yn eu dyddiau

Dros y blynyddoedd maith.

Fe droist genhedloedd allan,

Ond eto’u plannu hwy.

Difethaist bobloedd lawer,

Ond llwyddo’n tadau’n fwy.

3-4aOherwydd nid â’u cleddyf

Y cawsant hwy y tir,

Ac nid â’u braich y cawsant

Y fuddugoliaeth wir,

Ond trwy nerth dy ddeheulaw

A llewyrch d’wyneb di,

Am dy fod yn eu hoffi,

Fy Nuw a’m brenin i.

4b-7Ti sy’n rhoi buddugoliaeth

I Jacob, trwot ti

Y sathrwn a darostwng

Ein holl elynion ni.

Nid ymddiriedaf bellach

Mewn cleddau na bwâu,

Cans ti a gywilyddiaist

Y rhai sy’n ein casáu.

8-10Yn Nuw y bu ein hymffrost.

Clodforwn d’enw mawr;

Ond yr wyt wedi’n gwrthod,

Ac nid ei di yn awr

I ymladd gyda’n byddin,

Ond gwnei i ni lesgáu,

Ac fe’n hysbeilir bellach

Gan rai sy’n ein casáu.

11-14Fe’n lleddaist megis defaid,

A’n gwasgar ledled byd.

Fe’n gwerthaist ni heb elw,

A’n gwneud ni’n warth i gyd,

Yn destun gwawd a dirmyg

Pob cenedl is y nen.

Fe’n gwnaethost yn ddihareb,

A’r bobl yn ysgwyd pen.

15-16Fe’m cuddiwyd mewn cywilydd

A gwarth oherwydd sen

Y gelyn a’r dialydd

Yn seinio yn fy mhen.

A hyn i gyd ddaeth arnom

Er nad anghofiwn ni

Mohonot, na bradychu

Dy lân gyfamod di.

17-21Ni throesom chwaith o’th lwybrau

I beri iti’n awr

Ein sigo yn lle’r siacalau

A’n cuddio â chaddug mawr.

Ped anghofiasem d’enw

A throi at dduw di-fydd,

Fe fyddit ti yn gwybod.

Does dim i ti yn gudd.

22-26Ond er dy fwyn fe’n lleddir

Fel defaid drwy y dydd.

Ymysgwyd, pam y cysgi,

A’th wyneb teg ynghudd?

I’r llwch yr ymostyngwn,

Fe’n bwriwyd ni i’r llawr.

O cod i’n cynorthwyo,

Er mwyn dy gariad mawr.