Salmau 32 - New Metrical Psalms 2008 (Gwynn ap Gwilym)

SALM 32Bendithion edifeirwchCrug-y-bar 98.98.D

1-4Mor ddedwydd y sawl y maddeuwyd

Ei drosedd, y cuddiwyd ei gam,

Na ddeil Duw’r un twyll yn ei erbyn,

Nad oes yn ei ysbryd ddim nam.

Tra oeddwn yn gwrthod cyfaddef,

Fe nychwn, dan gwyno’n ddi-les;

Yr oedd dy law’n drwm arnaf beunydd,

A sychwyd fy nerth fel gan des.

5-6Ac yna, bu imi gyfaddef

Fy mhechod i gyd wrthyt ti.

Dywedais, “Cyffesaf fy mhechod”,

A bu iti faddau i mi.

Am hyn, fe weddïa pawb ffyddlon,

Fy Nuw, arnat ti dan eu clwy,

A phan ddaw llifeiriant o ddyfroedd

Ni chânt byth nesáu atynt hwy.

7-10Ti ydyw fy nghysgod rhag adfyd.

Yr wyt yn f’amgylchu â chân.

Dywedaist, “Hyfforddaf di a’th ddysgu,

A chadwaf dy lwybrau yn lân.

Paid â bod fel mul neu fel ceffyl

Ystyfnig y mae’n rhaid tynhau

Yr enfa a’r ffrwyn i’w rheoli

Cyn byth yr anturiant nesáu”.

Daw poenau di-rif i’r drygionus,

Ond cylch o ffyddlondeb byth yw

Y gyfran gyfoethog sy’n aros

Y sawl sy’n ymddiried yn Nuw.

11Am hyn, llawenhewch yn yr Arglwydd,

Rai cyfiawn, a’i foli ar gân;

A chanwch yn uchel i’w enw,

Bob un y mae’i galon yn lân.