Salmau 90 - New Metrical Psalms 2008 (Gwynn ap Gwilym)

SALM 90Tragwyddoldeb Duw, meidroldeb dynPraise, my soul 87.87.87

1-2Arglwydd, buost noddfa inni

Drwy y cenedlaethau i gyd.

Ers cyn geni y mynyddoedd

A chyn esgor ar y byd,

Ti sydd Dduw o dragwyddoldeb

Hyd at dragwyddoldeb mud.

3-6Fe wnei’n llwch yr holl ddynolryw.

Mil blynyddoedd, Arglwydd mawr,

Sydd i ti fel doe a ddarfu,

Ac fel cysgu tan y wawr.

Sgubi hwy i ffwrdd fel breuddwyd,

Neu fel crinwellt oddi ar lawr.

7-9Fe ddarfyddwn gan dy ddicter,

A’n brawychu gan dy lid.

Dodaist yng ngoleuni d’wyneb

Ein pechodau cudd i gyd.

Derfydd fel ochenaid egwan

Ein blynyddoedd yn y byd.

10-12Hyd ein hoes yw saith deng mlynedd –

Wyth deg, hwyrach – ond mae’u hyd

Yn llawn blinder, ac ânt heibio.

Pwy, fel ni, a ŵyr dy lid?

Dysg ni, felly, i gyfri’n dyddiau,

Inni fod yn ddoeth ein bryd.

13-15Am ba hyd? O Arglwydd, dychwel

At dy bobl, a thrugarhau,

A’n digoni ni â’th gariad

Nes cawn eto lawenhau.

Rho in flwyddyn o lawenydd

Am bob blwyddyn o’n tristáu.

16-17Boed yn amlwg iawn i’th weision

Dy weithredoedd mawr a’th fri.

Arglwydd Dduw, disgynned arnom

Dy raslonrwydd hyfryd di.

Llwydda waith ein dwylo inni,

Llwydda waith ein dwylo ni.