Salmau 63 - New Metrical Psalms 2008 (Gwynn ap Gwilym)

SALM 63Sychedu am DduwEllers 10.10.10.10

1-2O Dduw, ti yw fy Nuw; amdanat ti,

Fel sychdir cras am ddŵr, sychedaf fi,

Dihoenaf am gael gweld d’ogoniant mawr,

A welais yn y cysegr lawer awr.

3-5Gwell yw na bywyd dy ffyddlondeb di.

Am hynny, fe’th foliannaf. Codaf fi

Fy nwylo byth mewn gweddi i’th enw pêr.

Caf fy nigoni ar fraster ac ar fêr.

6-8Pan, ar fy ngwely y nos, dy gofio a wnaf –

Fel y cysgodais dan d’adenydd braf –

Fy enaid fydd yn glynu wrthyt ti;

Bydd dy ddeheulaw yn fy nghynnal i.

9-11Ond am y rhai a wnâi im drais a chlwy,

Ysglyfaeth i lwynogod fyddant hwy;

A bydd y brenin byth yn llawenhau

Yn Nuw, cans tewir pob celwyddgi gau.