Salmau 68 - New Metrical Psalms 2008 (Gwynn ap Gwilym)

SALM 68Caned y teyrnasoedd i DduwLobe den Herren 14.14.4.7.8

1-3Boed i Dduw godi, a boed i’w elynion wasgaru.

Fel cwyr mewn tân, boed i’r rhai a’i casâ gael eu chwalu.

Bydded i’r drwg

Ddarfod o’i flaen ef fel mwg,

A’r cyfiawn yn gorfoleddu.

4-6Canwch i Dduw, sy’n marchogaeth trwy dir yr anialwch.

Tad yr amddifaid, gwarchodwr y gweddwon. Moliannwch

Y Duw a wnaeth

Gartref i’r unig a’r caeth,

A throi’r rhai drwg i’r diffeithwch.

7-10Crynodd y ddaear pan aethost trwy’r anial o’n blaenau.

Glawiodd y nefoedd o’th flaen di, Dduw Israel, Duw Sinai.

Caiff dy braidd fyw

Yn d’etifeddiaeth, O Dduw,

A gwyli dros bawb mewn eisiau.

11-14Rhoes Duw y gair, ac mae llu yn cyhoeddi’r newyddion.

Mae’r merched gartref yn rhannu trysorau’r gelynion.

Pan chwalodd Duw

Yno bob byddin a’i llyw,

Roedd eira ar Fynydd Salmon.

15-16Ti, Fynydd Basan, sydd uchel, a thal dy gopaon,

Pam yr edrychi mewn cymaint cenfigen ar Seion,

Lle y mae Duw

Wedi ei ddewis i fyw,

Cartref ei fythol fendithion?

17-18Yr oedd cerbydau yr Arglwydd yn filoedd ar filoedd

Pan ddaeth i’w gysegr yn Seion, a’i gaethion yn lluoedd.

Rhoesant i gyd

Roddion i Dduw yr holl fyd

Yno, lle trig yn oes oesoedd.

19-23Bendigaid beunydd yw’r Arglwydd. Rhag angau fe’n ceidw.

Duw sy’n gwaredu yw Duw’n hiachawdwriaeth; ond geilw

Yr euog oll

O uchder Basan a’r holl

Foroedd i’w difa yn ulw.

24-27Gwelir d’orymdaith i’r cysegr, Arglwydd – cantorion

Ac offerynwyr yn arwain, yna morynion

Yn canu’n llon

Iti, Dduw Israel, gerbron

Y llwythau a’u tywysogion.

28-31O Dduw, o achos dy deml yn Jerwsalem, brysied

Pobl Ethiopia a’r Aifft atat ti gyda’u teyrnged.

Ond pâr ddileu

Y lloi o bobl sy’n dyheu

Am ryfel, arian a hoced.

32-35Canwch i Dduw; rhoddwch foliant i’r Arglwydd, deyrnasoedd.

Gwrandewch lais nerthol yr un sy’n marchogaeth y nefoedd.

Ofnadwy yw

Grym a gogoniant ein Duw.

Bendigaid fo yn oes oesoedd.