Salmau 77 - New Metrical Psalms 2008 (Gwynn ap Gwilym)

SALM 77Pa dduw mor fawr â’n Duw ni?Morning has broken 10.9.10.9

1-2Gwaeddais yn daer ar Dduw, ac fe’m clywodd.

Ceisiais yr Arglwydd yn nydd fy mhoen –

Estyn fy nwylo’n ddiflino ato.

Nid oedd i’m henaid gysur na hoen.

3-6Pan wyf yn meddwl am Dduw, rwy’n cwyno.

Cedwaist fi oriau’r nos ar ddi-hun.

Cofiaf y dyddiau gynt, a myfyriaf,

Ac yn fy ing fe’m holaf fy hun:

7-8“A fydd fy Nuw am byth yn fy ngwrthod,

A chadw’i ffafr oddi wrthyf byth mwy?

Beth am ei gariad a’i addewidion:

Pa hyd y pery i’w hatal hwy?

9-10A fwriodd Duw o’i gof bob trugaredd,

A chloi’i dosturi yn ei lid llym?”

Yna dywedais, “Hyn yw fy ngofid:

Collodd deheulaw’r Arglwydd ei grym”.

11-13Galwaf i gof weithredoedd yr Arglwydd.

O Dduw, meddyliaf am dy waith di.

Sanctaidd dy ffordd, yn gwneud rhyfeddodau.

Pa dduw mor fawr ag yw ein Duw ni?

14-16Ti yw y Duw sy’n gwneud pethau rhyfedd.

Cedwaist â’th fraich blant Israel yn fyw.

Gwelodd y dyfroedd di, ac arswydo;

Crynodd o’th flaen y dyfnder, O Dduw.

Roedd y ffurfafen fry yn taranu,

A fflachiodd saethau’r mellt ar bob llaw,

17-18Ac fe ddisgynnodd dŵr o’r cymylau.

Crynodd y ddaear gyfan mewn braw.

19-20Fe aeth dy ffyrdd drwy’r môr a’i lifddyfroedd,

Eithr ni welwyd dim oll o’th ôl.

Ti a’n harweiniaist, trwy gyfarwyddyd

Moses ac Aron, fel praidd ar ddôl.