Salmau 97 - New Metrical Psalms 2008 (Gwynn ap Gwilym)

SALM 97Brenhiniaeth a grym yr ArglwyddJoanna 11.11.11.11

1-2Mae’r Arglwydd yn frenin; boed lawen y byd

Hyd eitha’r ynysoedd pellennig i gyd.

Mae cwmwl a chaddug o’i amgylch, a sail

Ei orsedd yw barn a chyfiawnder di-ail.

3-5Mae’n llosgi’i elynion oddi amgylch â thân.

Mae’i fellt yn goleuo y ddaear achlân.

Mae’r holl fyd yn gweld, ac yn crynu yn llwyr

O’i flaen, a’r mynyddoedd yn toddi fel cwyr.

6-7Mae’r nef yn cyhoeddi’i gyfiawnder, a gwêl

Y bobl ei ogoniant. Cywilydd a ddêl

Ar bawb sy’n addoli gau-dduwiau di-werth.

Ymgrymwch, chwi dduwiau, i Arglwydd pob nerth.

8-9O achos dy farnedigaethau, llon yw

Jerwsalem a threfi Jwda, O Dduw.

Oherwydd yr ydwyt goruwch yr holl fyd;

Dyrchafwyd di’n uwch na’r holl dduwiau i gyd.

10-12Fe gâr Duw gasawyr drygioni, a dwg

Fywydau’i ffyddloniaid o ddwylo’r rhai drwg.

Llewyrcha goleuni ar yr uniawn. O dewch,

Rai cyfiawn, a molwch; yn Nuw llawenhewch.