Salmau 150 - Welsh Metrical Psalms by William Rees 1875

SALM CL.8.8.6.

1Molwch yr Arglwydd. Molwch Dduw

Yn mhurdeb ei sancteiddrwydd gwiw:

Molwch ef, nef y nef.

2Ei enw molwch — rhowch fawrhâd

A chlodydd i’w gadernid mâd,

O! molwch, molwch ef.

3Molwch â llais yr udgorn cry’,

Y nabl fwyn, a’r delyn gu,

4A thympan, dawns, a chân:

A’r dwsmel esmwyth, molwch ef,

Ac â phibellau ’r organ gref,

Molwch ei enw glân.

5Gwnewch i’r symbalau seinio i gyd

Ei glodydd allan dros y byd:

Molwch yr Arglwydd Dduw.

6Molianned pawb sy’n berchen chwyth,

Ei enw’n bêr heb dewi byth:

Anfeidrol deilwng yw!

Nodiadau.

Yma y terfyna y Salmau yn oddaith o fawl! Gelwir a chymmhellir pob perchen anadl i foliannu yr Arglwydd ar bob offer cerdd oedd yn adnabyddus ac arferedig yn Israel ar y pryd. Pa un a ydyw defnyddio gwahanol offerynau cerdd, o’r fath a enwir yma, yn gydweddol â gwasanaeth addoliad eglwys Dduw dan y Testament Newydd, neu nad yw, ni cheisiaf fi benderfynu. Beth bynag, y mae mawl i aros iddo ef yn Seion byth, ac i gael ei gyflwyno yn gymdeithasol hefyd. Nid oes un ddeddf ynghylch y ffurf o foliannu i’w chael yn y Testament Newydd.