Salmau 144 - Welsh Metrical Psalms by William Rees 1875

SALM CXLIV.8au.Salm Dafydd.

1Bendigedig fyddo’r Arglwydd,

Ef yw’m nerth, a’m hardderchawgrwydd;

Dysg fi ’drin y cledd a’r bŵa —

Gwnaeth fi’n gadarn i ryfela.

2Fy nhrugaredd a’m diffynydd,

Fy nghraig, fy nharian, a’m Gwaredydd,

Ynddo ’n wastad y gobeithiaf:

Ef sy’n dwyn fy mhobl danaf.

3Beth yw dyn i ti i’w gofio,

Ac i osod mawredd arno?

4Dyn sydd debyg iawn i wagedd,

Diflanedig yw ei sylwedd.

5Arglwydd, gostwng lawr dy nefoedd;

Disgyn, cyffwrdd â’r mynyddoedd;

6Saetha fellt, gwasgara ’r dynion

Sydd, O Dduw! i ti’n elynion.

7Oddi uchod dy law anfon,

Gwared fi o ddyfroedd mawrion,

Rhag estroniaid gwâg ysgeler,

8Sydd â’u dwylaw ’n llawn o ffalsder.

9Canaf etto ganiad newydd

I ti, O! fy Nuw, a’m Harglwydd!

Ar y delyn bêr, a’r degtant,

Y datganaf dy ogoniant.

Rhan

II.

8au.

10Ef o’i garedigrwydd helaeth,

Rydd i’w frenin iechydwriaeth:

Gweryd Ddafydd yn wastadol

Rhag y cleddyf llym niweidiol.

11Gwared, achub fi o ddwylo

Meibion estron sy’n fy mlino;

Rhai llefara ’u genau wagedd,

A’u deheulaw ’n llawn o ffalsedd.

12Fel bo i’n meibion yn eu hie’ngctid

Dyfu fel olewydd hyfryd,

Ac bo’n merched fel colofnau

Prydferth welir wrth balasau.

13Fel bo’n celloedd oll yn llawnion

O bob lluniaeth a darparion;

Ac bo’n praidd yn myn’d ar gynnydd

Fil a myrddiwn ar ein dolydd.

14Fel bo’n hychain oll yn gryfion,

I lafurio ’n meusydd ffrwythlon:—

Heb ruthro i mewn, na myned allan,

Gwaedd na dychryn mewn un drigfan.

15Pobl wynfydedig ydynt

Hwy, y rhai mae felly iddynt;

Ond y bobl mae Iehofa

Yn Dduw iddynt, yw’r dedwydda’.

Nodiadau.

Rhyw fuddugoliaeth ar elynion oedd yn ymosod arno ar ddechreuad ei deyrnasiad, a chyn uniad llwythau Israel dan ei awdurdod, oedd yr achlysur i Dafydd gyfansoddi y salm hon, fe ymddengys. Rhydd y gogoniant oll i Dduw am y fuddugoliaeth, fel y gwnai bob amser, gan ymgysuro y byddai i’r llwythau oedd etto heb ei gydnabod fel eu brenin wneyd hyny wrth weled fel yr oedd yr Arglwydd yn ei lwyddo. Gweddïa am barhâd y nodded dwyfol iddo ef a’i lywodraeth, nes iddo orchfygu a darostwng y cenhedloedd gelynol oeddynt etto yn barod i ymosod arno; y rhai nad oedd dim heddwch i’w wneyd â hwy, am y torent bob cyttundeb, gan wylio ar bob adeg a mantais i ymosod arno. Geudeb a ffalsedd oedd eu holl addewidion, y rhai a dorent mor fuan ag y gwneid hwynt. Hiraetha am weled Israel Duw yn heddychol a llwyddiannus dan ei nawdd a’i fendith ef, fel “wedi eu rhyddhau oddi wrth eu gelynion, y gwasanaethent yr Arglwydd mewn llawenydd a chariad ger ei fron ef,” yna byddent yn bobl wynfydedig yn wir.